Хан-Уул дүүргийн XI хороон дахь Зайсангийн зүүн буюу хуучин гүүрийн хөдөлгөөнийг өнөөдөр 23:00 цагт бүрэн хааж, баруун гүүрийн хөдөлгөөнийг сөрөг урсгалтай болгоно. Ингэснээр хуучин гүүрийг буулгах ажил эхлэх юм байна. Харин гүүрийг шинээр барих ажлыг ирэх дөрөвдүгээр сард эхэлж, долоодугаар сарын 10-нд ашиглалтанд оруулахаар төлөвлөжээ. Зайсангийн хуучин гүүрийг 56 жилийн өмнө ашиглалтанд оруулж байсан бөгөөд он цагийн уртад элэгдэж, нурах эрсдэлтэй гэсэн дүгнэлт гарч шинэчлэхээр болсон юм. Уг гүүрийн өргөтгөл, шинэчлэлийн ажилд нийслэлийн 2025 оны төсвөөс 15.8 тэрбум төгрөг зарцуулахаар баталсан. Зайсангийн гүүрийг 225 метр урт, дөрвөн эгнээ бүхий төмөр бетон хос гүүрээр шинэлчэх, өргөтгөх ажил 2022 оноос эхэлж, баруун буюу шинэ гүүрийг 2023 оны есдүгээр сард ашиглалтанд оруулсан билээ.