Чухам хэн, хэзээ ингээд хэлчихэв гэж уншигч та бодож байгаа нь гарцаагүй. Тэгвэл Украины Ерөнхийлөгчийн тамгын газрын дэд дарга Ирина Мудра “РБК-Украин” агентлагт өгсөн ярилцлагадаа “Ассамблейд зохих шийдвэр гаргах боломж бий. Одоогоор монголчууд юу ч болоогүй, ОУЭШ-ийн дүрмийг зөрчөөгүй мэт дүр эсгэж байна. Гэхдээ 2024 оны аравдугаар сарын 24-ний өдөр ОУЭШ-ийн доод танхим  Монгол Улс дүрмээр хүлээсэн үүргээ биелүүлээгүй гэдгийг хүлээн зөвшөөрсөн. Тиймээс Монгол Улсыг Ромын дүрмээс хасаж магадгүй” гэжээ.

Өнгөрсөн есдүгээр сард ОХУ-ын Ерөнхийлөгч Монгол Улсад айлчилснаас хойш Украины Ерөнхийлөгч Монгол Улсыг буруутгасан хэд, хэдэн мэдэгдэл хийгээд байсан юм. Хамгийн сүүлд Украины Ерөнхийлөгчийн тамгын газрын дэд дарга Монгол Улсыг ОУЭШ-ийн дээд танхим Ромын дүрмээс хасах асуудлыг хэлэлцэх ёстой гэж үзэж байна.

Монгол Улс 2024 оны 11 дүгээр сард ОУЭШ-д давж заалдах хүсэлт гаргаад байсан. Гэсэн ч ОУЭШ-ийн ээлжит хуралдаанаас давж заалдах хүсэлтийг хүлээж авахгүйгээр шийдвэрлэсэн юм. Монгол Улс нь ОХУ-ын Ерөнхийлөгч Владимир Путиныг айлчлах үеэр баривчлаагүй нь Олон улсын эрүүгийн шүүхийн дүрмийг зөрчсөн гэж үзээд байсан юм. Олон улсын эрүүгийн шүүх 10-р сард дээрх шийдвэрийг гарган Оролцогч орнуудын ассамблейд мэдүүлээд байсан билээ. Улмаар энэ шийдвэрийг Монгол Улсын талаас эсэргүүцэн давж заалдан, хоёр шүүгчийн эрхийг хасах хүсэлт гаргаад байжээ. Олон улсын эрүүгийн шүүхээс манай талаас тавьсан хүсэлтийг “хэргийн үндэслэл болон хэрэг хянан шийдвэрлэх ажиллагааны асуудлаар гаргасан албан ёсны шүүхийн шийдвэр биш тул давж заалдах боломжгүй” гэж албан ёсны мэдэгдэлд дурдаж байсан юм.

Ташрамд дурдахад Монгол Улс ОУЭШ-ийн Ромын дүрмийг 1998 оны долоодугаар сарын 18-ны өдөр баталж, 2002 оны долоодугаар сарын 1-ний өдрөөс хүчин төгөлдөр үйлчилж эхэлсэн юм.