Лондон дахь Кристисийн дуудлага худалдаагаар ойролцоогоор 150 сая жилийн настай үлэг гүрвэлийн яс үнэ хаялцууллаа. ВВС агентлагийн мэдээлснээр Аллозавр, Стегозаврын гурван цогц яс нийт 12.4 фунт буюу 15.7 сая ам.долларын үнэд хүрсэн байна. Ховор төрөлд тооцогддог дээрх үлэг гүрвэлийн яснуудыг анх АНУ-ын Вайоминг мужийн Карбон каунти орчмоос олж, малтаж гаргасан гэнэ. Кристисийн Шинжлэх ухаан, байгалийн түүхийн хэлтсийн дарга Жеймс Хислоп хэлэхдээ “Манай дэлхий гарагийн өнгөрсөн үеийн гайхамшиг болсон балар эртний үлэмж биетнүүдтэй зэрэгцэн зогсоход туйлын таатай байлаа” гэжээ. Дээрх Аллозавр болон Стегозаврын чулуужсан яс нь хожуу юрийн галавын үеийн гол төлөөлөгчид аж. Ялангуяа, Аллозавр нь Тираннозавр рексийн анхдагч үе гэж үздэг бөгөөд хурц савар, хүчирхэг эрүүтэй тул тухайн цаг үеийнхээ хамгийн хүчирхэг араатан байсан юм. Харин Стегозаврын тухайд өвсөн тэжээлтэн бөгөөд хавтгай хуяг, хурц өргөс бүхий сүүлээрээ бие хамгаалж, хамгийн эрс тэс нөхцөлд дасан зохицож чадвар өндөртэйгээрээ гайхагдсан төрөл. Ноён Хислопын мэдэгдсэнээр үлэг гүрвэлүүд яснууд бүрэн бүтэн олдоогүй учир гурван хэмжээст хэвлэгч ашиглан дутуу хэсгүүдийг гүйцээсэн гэлээ.