Европын Сэргэн мандалтын үеийн гарамгай зураачид уран бүтээлдээ олон арван нууцыг шингээн үлдээснээрээ алдартай. Үүний жишгээр Италийн уран зураач, барималч, сийлбэрчин Микеланжелогийн Ватикан дахь Сикстиний сүмийн хананд зурсан “Шүүлтийн өдөр” зурагнаас нүдэнд ил боловч хэний ч анзаарч хараагүй нэгэн нууцыг урлаг судлаачид олж илрүүлжээ. Зургийг дуусгаснаас хойш 500 жилийн дараа илэрсэн тэрхүү нууцыг Мария Магдалена гэх аж. Өндөр нь 12.192 метр, өргөн нь 13.716 метр харьцаатай “Шүүлтийн өдөр” ханын зурагт Исүс Христ хүний дэлхий дээр хоёр дахиа ирж буй үйл явдалыг харуулсан бөгөөд гамшигт үйл явдал дагалдаж, нийт гурванзуу гаруй дүрийн заримыг тэнгэр өөд өгсөж буйгаар, заримыг нь тамд унаж буйгаар дүрсэлжээ.

Зургийн баруун гар талын доод буланд шар хажлагатай нэгэн нууцлаг эмэгтэйг дүрсэлсэн нь Исүс Христийн амраг хайрт, авааль эхнэр Мари Магдалена мөн гэж урлагийн мэргэжилтнүүд дүгнэжээ. Хагас мянганы турш бүхний нүдэн дээр ил байсан боловч үл анзаарагдам энэ чухал дүрийг ач холбогдолгүй мэт дүрсэлсэн нь Микеланжелогийн нэгэн суут заль байлаа гэж Италийн уран зураг сэргээн засварлагч Сара Панко онцолсон байна.

Түүний энэ дүгнэлтийг Ром дахь Грегорианы их сургуулийн профессор Ивонн Дона Шлобиттен дэмжиж “С.Панкогийн ийн үзэх нь үндэслэлтэй. Учир нь, шүтээн дүрслэл болог теологийн талаас нь харахад хэдийгээр маш нууцлагдмал байдлаар дүрсэлсэн ч гэлээ нэлээд чухал үүрэгтэй хүн учраас л Исүс Христийг цовдолсон загалмайг үнсэж буй нь тэр” хэмээн тайлбарлажээ.

Түүхэн сударт Мари Магдаленаг Исүс Христтэй ойртож, нүглээ цайруулахыг оролдсон биеэ үнэлэгч байсан гэж бичиж үлдээсэн боловч энэхүү худал ойлголтыг залруулахын тулд Пап лам Х Клемент 1669 онд нэр төрийг нь сэргээн гэгээнтэн болгон зарлаж байсан аж.