Эрдэмтэд Чилийн эрэг орчмын Атакамын хоолойгоос шинжлэх ухаанд урьд хожид мэдэгдэж байгаагүй цоо шинэ төрлийн аварга араатан амьтны ул мөрийг олж нээжээ. Хэдийгээр өнөөдөр ч хүний үзэгдэж харагдаагүй боловч уг амьтны үлдээсэн ул мөрийн ДНХ-ийн судалгаагаар биеийн харьцаа нь “нэн үлэмж” бөгөөд ширүүн, догшин араншинтай араатан гэж далай, тэнгисийн амьдрал судлаачид үзэж буй аж.
Уг араатан дэлхийн хамгийн амьдралгүй буюу далайн хэт гүн хэсэгт амьдардаг гэнэ. Systematics and Biodiversity сэтгүүлд гарсан цоо шинэ судалгааны үр дүнгийн талаарх тайлан нийтлэлээс харахад Dulcibella camanchaca хэмээх хавч хэлбэртэн нь далайн түвшнээс 7,300 метрийн гүнд амьдардгаараа туйлын онцлогтой аж. Дээр дурдсан нэр нь харанхуй гэх утгыг заах ба шинээр нээсэн араатан нь маш хурдан хөдөлгөөнтэйг эрдэмтэд онцолж байна.


Вүүдс Хөүлийн далай судлалын хүрээлэнгийн эрдэмтдийн “нэн үлэмж” гэж нэрлэсэн энэхүү араатан нь бодит байдал дээр ердөө дөрөвхөн сантиметр урт биетэй. Мөн далайн ёроолд, хэт гүнд амьдардаг учраас өнөөг хүртэл үзэгдэж, харагдаагүй төрөлд ангилсан гэж судлаачид тайлбарлажээ. Араатан гэж нэрлэсэн нь өчүүхэн мэт боловч асар түргэн шаламгай хөдөлгөөн, ангаа барих нь яг л хуурай газрын анчид шиг ухаан зардаг учраас юм байна.

Харин ДНХ-ийн судалгаагаар Атакамын хоолой орчмын ижил, төст амьтадтай харьцуулахад эрс өөр тул цоо шинэ төрөлд хамааруулан үзэх нь зөв аж.