Дөрөв, дөрвөн жилээр сонгуулийн өнгөөр улс төрийн гортиг зурагддаг Монгол Улсад Засгийн бодлого нь дөрвөн жил биш дөрвөн сар ч хүрэхтэй үгүйтэй болж. Хамтарсан Засгийн газар наймдугаар сарын сүүлээр мөрийн хөтөлбөрөө танилцуулсан. Танилцуулахдаа ойрын дөрвөн жилдээ инфляцыг 5 хувь дотроо барина гэж тооцсон. Тооцоо буруу байжээ. Үндэсний статистикийн хорооны 11-р сарын тайлан мэдээнд инфляц өмнөх оны мөн үеэс 8.1 хувиар өссөн болохыг дурджээ. Өмнөх сараасаа 1.7 хувиар өссөн байна. Ийнхүү өсөхөд орон сууц, ус, цахилгаан, түлшний бүлгийн үнэ 22.1 хувиар нөлөөлжээ. Өмнөх саруудаас илүүгээр нөлөөлсөн гэсэн үг. Араас нь хувцас, бөс барааны үний 8.4 хувиар, хүнсний барааны үнэ 7.4, гэр ахуйн тавилга 7 хувиар өссөн өссөн нь ч нөлөөлсөн байна. Ийнхүү инфляц Монголбанкны зорилтоос ч давлаа.

Засаг мөрийн хөтөлбөрөө танилцуулаад “Хурдтай хөгжлийн төлөөх зориг” гэж цээжээ дэлдсэнээс сар хүрэхгүй хугацааны дараа эрчим хүчний үнийн өсөлт инфляцид нөлөөлөхийг гадна, дотнын байгууллагууд удаа дараа анхааруулж байлаа. Үүнийг нь харин ч нэг тоогоогүй дээ. Мөнөөхөн дээр дурдса мөрийн хөтөлбөт эрчим хүчний реформыг бас тусгачихсан. Реформын хамгийн эхний алхам нь цахилгаан, дулааны үнийг нэмэгдүүлэх явдал байв. Станц нь хөлдөх дээрээ тулж, дэлхийн жишигт байхгүй үнэээр эрчим хүч үйлдвэрлэдэг гэдэг мэдээллийг удаа дараа сэвсээр үнээ нэмээд авсан. Нэг ёсондоо бодлогогүй төрийн гайг ард иргэд нь үүрч 11-р сарын 15-наас эхлэн цахилгааны дундаж тариф 1 КВт.ц тутамд 280 төгрөг төлж байгаа. Цахилгааны үнэ, сонгуулийн дараа инфляц өсдөг хэлтгий зүй тогтол, цалин, тэтгэврийг хоёр ч удаа нэмж, 1072 хувьцаа нэрээр бэлэн мөнгө тараасан нь оны эцэст, ирэх оны эхний улиралд ч сөргөөр нөлөөлж ийнхүү инфляц нэмэгдлээ.

Улстөрчид сонгуулийн оноо болгох хэрэгсэл болгож ашигласаар ирсэн үг бол инфляц. Гэвч инфляцын цулбуур тэдэнд биш эдийн засагт байдаг нь даанч гачлантай. Гачланг илтгэх мэт Дэлхийн банк болон Олон улсын валютын сан зэрэг байгууллагууд инфляц цаашид ч өснө гэж дүгнэсэн. Гол нь мөчлөг сөрсөн эдийн засгийн бодлого боловсруулж, реформ хийхгүйгээр инфляцын цулбуурыг атгаж чадахгүй. Дээрээс нь төсөв тэлээд байдаг. Тэлсээр 30 их наяд төгрөгийг даваад явчихсан. Мөрийн хөтөлбөр нь мөрөөдөл, “Алсын хараа” нь харалган болгохгүйн тулд дорвитой бодлого бий юу...