Европ дахинд 45 жил үргэлжилсэн саарал чоно агнахыг хориглосон хатуу тогтоолыг энэ долоо хоногт цуцалж магадгүй байна. Европын хорооны дэвшүүлсэн саналаар Бернийн конвенцийн дагуу баталсан чоно хамгаалах хөтөлбөрийн хоригийг зэрэг бууруулж, хоёроос гуравдугаар түвшинд буулгах асуудлаар тус тивийн орнууд хэлэлцэнэ. Эх сурвалжуудын мэдээлж буйгаар уг санал дэмжигдэж, батлагдах хандлагатай байгаа гэнэ. Хэрэв дэмжигдвэл чонын тоо толгой өсөхөд хүргэсэн хатуу, чанга хоригуудыг цуцалж, зөвхөн хамгаалах хөтөлбөр хэрэгжих юм. Өөрөөр хэлбэл Европ даяар чонын ав эхэлнэ гэсэн үг юм. Гэхдээ жил тутамд агнуурын квот тогтоож байх юм байна.

Европын хорооны мэдээлж буйгаар тус тив дэх чонын тоо толгой хоёр дахин өссөн бөгөөд 2012 онд 11,000 толгой байсан бол өнөөдөр 20,000-д хүрч мал сүрэгт ихээхэн хохирол учруулж байна.

Гэтэл байгаль хамгаалагч идэвхтнүүд хоньч нохдыг олноор сургаж, бэлтгэх зэргээр хядлага үйлдэхээс сэргийлэх боломжтой аргуудыг санал болгож байгаа юм байна. Тэдний үзэж буйгаар чоно нь ой, бэлчээр сүйтгэдэг буга, бодон гахай зэргийг устгах ашиг тустайг санууллаа. Мөн өвчтэй ан, амьтдыг устгаснаар төрөл бүрийн тахал гарахаас сэргийлдгийг ч сануулжээ.

Словакын биологич Михаль Харинг “Афик гахайн ханиад Европ даяар тархаж байна. Энэ өвчний эсрэг хамгийн сайн ажилладаг эмч бол чоно юм. Чоно уг өвчнөөр өвчилдөггүй онцлогтой” гэжээ.

Тэгээд ч Европын холбооны 2023 оны тайлангаас харахад Европ тив 68 сая хоньтой бөгөөд жилд 50,000 толгой нь л чонын хоол болдог. Энэ нь нийт хонин сүргийн 0.065% тул заавал агнаж, устгах шаардлагагүй гэж тайлбарлав.

Мөн ангийн мэргэжилтнүүд чоно агнах тал дээр ч санаа бодлоо илэрхийлжээ. Тэднийхээр чоно агнахдаа сүргээр нь бүрэн устгадаг байх хэрэгтэй гэнэ. Учир нь, чонын нэг сүргийг 5-8 толгой чоно бүрдүүлэх бөгөөд дутуу устгасан тохиолдолд ганц, хоёроор үлдсэн чононууд идэш тэжээлээ олохын тулд айлын мал руу дайрах эрсдэлтэй аж.