АНУ-ын Ерөнхийлөгчөөр сонгогдоод буй Дональд Трамп Украинийн дайныг дуусгахын тулд В.Путинтай уулзаж, талуудыг найрамдлын гэрээ байгуулахад зуучилж, дайныг дуусгана гэж амласан. Ингэснээр 1,000 гаруй хоногтоо үргэлжилж буй цус асгаруулсан дайн ойрын хугацаанд дуусах нь гэсэн итгэл зарим хүмүүст төрж эхэлсэн. Гэхдээ украинчуудын хувьд эсрэг байр суурьтай байна. Бараг өдөр бүр пуужин, дронын дайралтад өртөж буй Киев хотыг хамгаалж байгаа Бучагийн шуламнууд гэх 90% нь эмэгтэйчүүдээс бүрдсэн сайн дурын армийнхан энэ дайныг найрамдах замаар дуусгаж болохгүй гэж үзэн байлдааны бэлтгэлээ улам эрчимжүүлсээр байна. Уг армийн бүрэлдэхүүнд багтдаг эмэгтэйчүүд бүгд Киевийн ойролцоох Буча хотынх тул ийм нэртэй болжээ.

Нөхөр, хөвгүүд, хамаатан садан, найз нөхдөө дайнд алдсан эмэгтэйчүүд түрэмгийлэгч оросуудад бууж өгөхөөс эрс татгалзаж, амиараа тусгаар тогтнолоо хамгаалахаар нэгэнт шийдсэн аж. Мөн тэд В.Путинд итгэж болохгүйг анхааруулаад найрамдлын гэрээ байгуулсан ч 3-5 жилийн дараа дахин эх нутаг руу нь өндөлзөх учир заавал байлдааны ялалтаар энэ дайныг дуусгана гэж ярьж байна. Жишээ нь, 41 настай Тетьяна гэх эмэгтэй нөхөр, хүү хоёроо фронтод алдсан бөгөөд В.Путин  найрамдлын гэрээгээр халхавчлан байлдааны явцыг сулруулж, нууцаар хүчээ нөөж байж мэдэх юм хэмээн сэрдэж буйгаа хэлжээ. Энэ ч утгаараа тэд Украинийн Ерөнийлөгч Володимир Зеленский найрамдлын гэрээний сургаар дайн удахгүй дуусах нь гэж үзэн санаа амарч буй нь буруу гэж шүүмжлэв. Бучагийн шуламнууд буудлагаас гадна оросуудын ашиглаж буй Иранд үйлдвэрлэсэн Шахед дроныг агаарт устгах тактикын бэлтгэл тогтмол хийж байгаа юм байна.