ОХУ-ын Ерөнхийлөгч Владимир Путин Умард Солонгосын ард түмэнд улс түмний найрамдлын бэлгэ тэмдэг болгож 70 тооны амьтан бэлэглэжээ. Африкын арслан, бор баавгай, бар зэрэг эдгээр амьтад Пхеньяны төв амьтны хүрээлэнд байрших юм. Москвагийн амьтны хүрээлэнгийн мэргэжилтнүүд, малын эмч нарын дагалдсан багийнхныг ОХУ-ын Байгаль орчны сайд Александр Козлов ахалсан байна.

ОХУ-ын хувьд энэ нь анхны удаагийнх биш юм. Энэ оны дөрөвдүгээр сард ОХУ-аас бүргэд, тогоруу, тоть зэрэг жигүүртнийг илгээж байсан билээ. Өнгөрсөн зургаадугаар сард ОХУ-ын Ерөнхийлөгч Владимир Путин Умард Солонгост айлчлахдаа хоёр улсын ард түмний соёлын харилцаанд анхаарна гэдгээ илэрхийлж байлаа. Цаашид Пхеньян хотын төв амьтны хүрээлэнг дэлхийн жишигт нийцүүлэх, жуулчдыг татах тал дээр ОХУ-ын талаас арга зүйн болон эдийн засгийн тусламж үзүүлэхэд бэлэн гэдгээ илэрхийлээд байгаа юм.