Нидерландын Гааг хотод байрлах Олон улсын эрүүгийн шүүх /ОУЭШ/-ийн ээлжит хуралдаанаар Монгол Улсыг гэрээнд заагдсан үүргээ биелүүлээгүй гэж албан ёсоор шийдвэрлэлээ. ОХУ-ын Ерөнхийлөгч Владимир Путиныг баривчлах тогтоол баталж, улмаар гишүүн улс орнууд баривчлах үүрэг хүлээх атал Монгол Улс уг үүргээ хэрэгжүүлэхгүйгээр эх орондоо урьсан нь гэрээг зөрчих гол үндэс болсон байна. Иймийн учир Монгол Улсыг шүүхийн захиргааны үйл ажиллагааг хянадаг Оролцогчдын ассамблейд шилжүүлжээ.

Шүүхийн мэдэгдэлд “Ромын дүрмийг хүлээн зөвшөөрсөн улс орнууд ОУЭШ-ийн шийдвэрийн дагуу албан тушаал, харьяалал, яс үндэс харгалзахгүйгээр шийдвэр гарсан л бол хүлээлгэн өгөх үүрэгтэй” гэж дурджээ.

ОУЭШ-ээс ОХУ-ын Ерөнхийлөгч Владимир Путиныг Украины эзлэгдсэн нутгаас хүүхдүүдийг хууль бусаар албадан гаргаж, ОХУ-ын нутагт дэвсгэрт хууль бусаар шилжүүлсэн гэж үзэн дайны гэмт хэрэгт буруутган баривчлах шийдвэр гаргасан билээ. Гэвч үүнийг эс харгалзан Монгол Улс Ромын дүрмийг соёрхон баталсан мөртлөө ОХУ-ын Ерөнхийлөгчийг баривчлахгүйгээр эх орондоо урьж, өнгөрсөн есдүгээр сард албан ёсны айлчлал болсон юм.

Монгол Улс ОУЭШ-ийн Ромын дүрмийг 1998 оны долоодугаар сарын 18-ны өдөр баталж, 2002 оны долоодугаар сарын 1-ний өдрөөс хүчин төгөлдөр үйлчилж эхэлсэн билээ.