Хар тэнгисийн эрэгт орших үзэсгэлэн Сочи хотод Владимир Путиний зуслангийн байшин гэгдэх тансаг харш байсан нь олон улсад удтал хэл ам дагуулсан. Энд байсан гэсний учир нь шүүмжлэл дагуулсан харшийг нураасан гэх мэдээлэл олон улсын хэвлэлээр цацагджээ. Мэдээллийг анх гаргасан ОХУ-ын сөрөг хүчний цахим хуудас Проектэд гарсан хиймэл дагуулын зургуудаас үзэхэд В.Путиний тансаг харш 2023 оны тавдугаар сард орчин тойрноо чимэн сүрлэгээр сүндэрлэж байсан бол энэ оны тавдугаар сард юу ч үгүй нурааж, газрыг нь цэвэрлэсэн байдалтай байна. Өмнө нь хэвлэлүүдэд гарсан мэдээлэлд дурдсанаар В.Путин Оросын өнцөг булан бүрд олон тансаг харштай бөгөөд тэр дундаас хамгийн хайртай нь энэхүү Сочигийн зуслан нь байсан гэдэг. Проект цахим хуудас харшийг нураасан талаар тайлбарлахдаа “Сочи нь сүүлийн үед Украинийн дронын дайралтад өртөх болсон учраас зочилж, зугаалахад аюултай бүс болсон. Магадгүй В.Путин амиа бодсондоо тийш зүглэхээ больж, хайртай харшаа нураасан байх л даа” гэжээ.