Дэлхийн цаг уур судлалын байгууллагаас гаргасан шинэхэн тайланд сэтгэл эмзэглүүлэм тун таагүй мэдээ багтжээ. Уг тайланд дурдсанаар сүүлийн таван жилд дэлхийн гол, мөрний түвшин огцом багассан бөгөөд энэ байдал цаашид үргэлжлэх төлөвтэй байна. Зөвхөн 2023 онд бүх гол, мөрний 50% хэвийн хэмжээнээс доод түвшинд хүртэл буурч зарим нь ширгэж үгүй болсон гэнэ. Мөн 2023 он бол агаарын температур дээд цэгтээ хүрсэн хамгийн халуун жил болжээ. Хэдийгээр өнгөрсөн жил хамгийн халуун боловч хур тунадас ихээр орох, үер буухаас өгсүүлээд олон тооны гамшиг дарааллан тохиолдсон нь цаг уурын өөрчлөлтийн уршиг аж. Мэргэжилтнүүдийн тайлбарласнаар агаарын температур нэмэгдсэнээр дэлхийн гидрологийн цикл алдагдаад эхэлчихжээ.
“Ус хомсдох нь цаг уурын өөрчлөлтийн дөнгөж эхлэл юм” гэж Дэлхийн цаг уур судлалын байгууллагын Ерөнхий нарийн бичгийн дарга Селесте Сауло Гвардиан сонинд өгсөн ярилцлагадаа сэрэмжлүүлсэн байна. Хэрэв хүн төрөлхтөн яаралтай арга хэмжээ авч цаг уурын өөрчлөлтийг бага ч болов сааруулахгүй бол аадар бороо олшрох, үер буух, ган, зуд тохиох зэргээр байгалийн гамшигт үзэгдлийн нөлөөгөөр олон сая хүний амь нас эрсдэлд орж, экосистем болон эдийн засгийн асар их хохирол амсах аюултайг С.Сауло анхаарууллаа.