Их Британийн төв телевиз ВВС-гийн гол мэдээллийн хөтөлбөрийн олон жилийн нүүр царай байсан алдарт хөтлөгч Хью Эдвардс өнгөрсөн даваа гарагт Лондонгийн шүүхээр орж, бага насны хүүхдийн зүй бүс зураг тараасан хэрэгт буруутайгаа хүлээн зөвшөөрч тохирох шийтгэлээ сонссон байна.
Хью Эдвардс нь ВВС агентлагийн мэдээллийн хөтөлбөрийг хорь гаруй жил хөтлөхдөө дэлхий даяар алдаршиж, 2022 онд хатан хаан Элизабетийн үхлийг улс орон даяар анх дуулгаж байсан нэр хүндтэй хөтлөгч байсан ч бага насны хүүхэд сонирхдог гаж донтон болж, олны царайг харах нүүргүй болоод байна.
Өдгөө 63 настай Х.Эдвардс нь өнгөрсөн долоодугаар сард гурван удаа бага насны хүүхдийн зүй бус зураг эвлүүлж, УатсАппаар 41 хууль бус зураглал бүхий контент тараасан гэх хэрэгт буруутайгаа хүлээсэн билээ. Түүний тараасан гэх зураглал дотор 7-9 насны хүүхдийн порнографик бичлэг багтаж байгаа аж.
Шүүгч Пол Голдспринг гэм буруутайгаа хүлээсэн түүнд зургаан сар шоронд хорих ял оноож, хоёр жилийн тэнсэн харгалзахаар солих шийдвэрийг өчигдөр гаргасан байна. Энэ нь Х.Эдвардс шоронд суухгүй ч дээр заасан хугацаанд гэмт үйлдлээ давтвал зургаан сарын хорих ялыг биеэр эдэлнэ гэсэн үг юм. Прокурор Иан Хөүпийн мэдээлснээр зүй бус зураглал дотор хоёр бичлэг хуулийн зүйлчлэлээр онц ноцтойд орох бөгөөд УатсАппаар тараасан нь олон хүнд хүрч, Х.Эдвардс тухайн бичлэгүүдийг илгээсэн этгээдээс дахин бичлэг явуулахыг хүссэн нь түүний засаршгүй педофиль болохыг харуулж байна гэжээ.
Х.Эдвардс хэдийгээр тэдгээр зураг, бичлэгийг өөрөө хийгээгүй боловч бусдаас хүлээн авсан гэх шалтгаанаар цааш задруулах ёсгүйг мэдсэн хэр нь хувийн хүсэл сонирхлоо нэгдүгээрт тавьсан нь уучилшгүй явдал тул хүнд ял оноох ёстой хэмээн прокурорууд шүүгчтэй маргажээ. Гэхдээ Хью Эдвардс гэм буруутайгаа хүлээн зөвшөөрч чин сэтгэлээсээ уучлалт хүссэн тул Лондонгийн шүүхийн шүүх бүрэлдэхүүн хэлэлцэж, байдлыг харгалзан үзэж, дээрх шийтгэлийг оноосон ч хатуу анхаарууллаа хэмээн тайлбарлаж буй юм.