Улс төр

Монгол, Оросын бизнес эрхлэгчдийн форумд ОХУ-аас 40 гаруй ААН-ийн 100-гаад төлөөлөл оролцож байна

2024/09/17
МҮХАҮТ-аас Евразийн Эдийн Засгийн Холбоо болон ОХУ-ын “Экспортын төв” групптэй хамтран “ОХУ-аас Монгол Улсад хэрэгжүүлэх олон салбарын бизнес” форумыг Улаанбаатар хотноо зохион байгуулж байна. Тус форумд Оросын талаас хүнсний үйлдвэрлэл, хөдөө аж ахуйн цогцолбор, химийн үйлдвэр, мэдээллийн технологи, дижитал технологи, эмнэлгийн тоног төхөөрөмж, урлагийн бүтээгдэхүүн, керамик эдлэл, үйлдвэрлэлийн тоног төхөөрөмж, технологи, тээвэр логистикийн салбаруудыг төлөөлсөн тэргүүлэх үйлдвэрлэгч, ханган нийлүүлэгч 40 гаруй аж ахуйн нэгжийн 100 орчим төлөөлөл оролцож байгаа бол Монголын талаас 100-гаад бизнес эрхлэгчид оролцож байна.
Бизнес форумыг нээж Монгол Улсын Шадар сайд, Монгол, Оросын Засгийн газар хоорондын комиссын Монголын хэсгийн ахлагч С.Амарсайхан хэлсэн үгэндээ “ОХУ бол Монгол Улсын гадаад худалдааны чухал түнш билээ. Өнгөрсөн жил гадаад худалдааны эргэлт 21 хувиар нэмэгдсэн бол энэ оны эхний долоон сарын байдлаар дахин 10 хувиар нэмэгдсэн. Тэгвэл энэхүү худалдааны эргэлтийн хувь хэмжээ цаашид улам бүр өсөн нэмэгдэх түүхэн боломж, бололцоо яг энэ цаг үед бодитоор бий болоод байна.
ОХУ-ын Ерөнхийлөгч саяхан манай улсад айлчлах үеэр яригдсан асуудлуудын нэг нь Монгол Улс, Евроазийн эдийн засгийн холбооны хооронд Чөлөөт худалдааны түр хэлэлцээр байгуулах асуудал бөгөөд яриа хэлэлцээ амжилттай үргэлжилж, 2024 ондоо багтаж албан ёсоор эцэслэгдэнэ гэсэн хүлээлттэй байна.
2026 оноос хүчин төгөлдөр үйлчилж эхлэх энэхүү хэлэлцээрийн хүрээнд Монгол Улсаас хөдөө аж ахуй, хөнгөн үйлдвэрийн бараа бүтээгдэхүүнийг илүү таатай нөхцөлөөр нийлүүлэх боломж бүрдэж, манай хоёр орны худалдаа, эдийн засгийн хамтын ажиллагаанд томоохон түлхэц үзүүлэх юм.
Монгол Улсаас Евроазийн эдийн засгийн холбооны гишүүн орнуудад гаргах мал аж ахуйн гаралтай 375 нэр төрлийн бараа бүтээгдэхүүнийг импортын татвараас бүрэн чөлөөлөхөөр болсон. Энэ нь Монгол Улсын хөдөө аж ахуйн салбар болон жижиг дунд үйлдвэрийг хөгжүүлэхэд ихээхэн дэмжлэг үзүүлэх төдийгүй хоёр улсын бизнес эрхлэгчдэд худалдаа, хөрөнгө оруулалт, бизнесийн салбарт хамтран ажиллах шинэ боломжуудыг нээх болно” хэмээн онцоллоо.
Монгол Улсын Засгийн газар 2024-2028 оны үйл ажиллагааны хөтөлбөртөө бүсчилсэн хөгжлийг гол болгож 600 гаруй том төслийг хэрэгжүүлэх зорилтыг баталсан. Энэ нь манай хоёр улсын бизнес эрхлэгч, баялаг бүтээгчдийн хийж бүтээх, хамтарч ажиллах өргөн боломжийг олгож байна. Тухайлбал, бүс орон нутгийн хөгжилд үнэтэй хувь нэмэр оруулах боловсруулах үйлдвэрийн тоног төхөөрөмжийг гаалийн албан татвараас 100 хувь чөлөөлөх, бүсүүдэд татварын таатай орчинг бүрүүлэхээр тусгасныг мөн хэллээ.

Холбоотой мэдээ

АТГ: Хэрэг бүртгэлтийн 2 хэрэгт 21 объектод нэгжлэгийн ажиллагаа явуулав
Хүннү хотын цэвэрлэх байгууламжийн барилгын ажил 10 хувьтай үргэлжилж байна
Сэлбэ гол болон Гүнжийн булаг дагуу нийтдээ 4000м даланг босгоод байна

Сэтгэгдэл бичих

Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд SHUGELULEEGCH.mn хариуцлага хүлээхгүй.
Сэтгэгдэл 0