БНАСАУ-ын удирдагч Ким Чен Ун өнгөрсөн зун нүүрлэсэн үер, хөрсний гулгаатай гамшгаас урьдчилан сэргийлэх тал дээр хариуцлага алдсан гэх 20-30 албан тушаалтанг цаазаар авсан талаар олон улсын мэдээллийн агентлагууд дамжуулж байна. Өмнөд Солонгосын Чосун телевизийн мэдээлснээр гамшгийн улмаас 4,000 хүн үрэгджээ. Умард Солонгосын талын нэрээ нууцалсан албаны хүн уг мэдээллийг өгсөн бөгөөд Ким Чен Ун гамшгийн улмаас олон тооны хүн амиа алдаж, “байж боломгүй хохирол” амссан тул хариуцлагатнуудад хатуу цээрлэл хүлээлгэхээр шийдвэрлэж, тэднийг өнгөрсөн сарын сүүлээр цаазаар аваачсан байна. Хэдийгээр цаазаар аваачсан албан тушаалтнуудын нэрс тодорхойгүй ч гэлээ Умард Солонгосын мэдээллийн төв агентлагийн мэдээлэлд дурдсанаар 2019 оноос хойш Чаган мужийн намын хорооны нарийн бичгийн даргаар ажиллаж байсан Кан Бүнхүнийг албан тушаалаас нь зайлуулсан гэжээ.

Сонирхуулахад, Covid-19 цар тахлаас хойш Умард Солонгост олон нийтийн өмнө цааз гүйцэтгэх явдал огцом өсчээ. Түүнээс өмнө жилд 10 орчим удаа нийтийн өмнө цээрлүүлэх ажиллагаа зохион байгуулдаг байсан бол цар тахлаас хойш арав дахин их буюу жилд 100 гаруй удаа олон нийтийн өмнө цааз гүйцэтгэх болсон байна.