Кембрижийн их сургуулийн судлаачид ган хайлуулах явцад цэвэр цемент гарган авах суут аргыг нээсэн талаар мэдээллээ. Хуучин буюу ашиглалтаас гарсан хоёр бохир материалыг нийлүүлж, цоо шинэ төрлийн цэвэр түүхий эд гарган авах боломж гэж ойлгож болно. Энэхүү аргыг сайтар боловсруулж, амьдралд нэвтрүүлбэл барилгын салбарын үйлдвэрлэлд хувьсал хийнэ гэж эрдэмтэд олзуурхжээ. Албан ёсны тоон баримтаас үзэхэд цемент болон ган хайлуулах явц дэлхийн агаарын бохирдлын 15%-ийг үүсгэдэг байна.

Хуучин бетоныг буталж, элс, чулууг нь ялган авч, цементийг халааснаар түүнд агуулагдах шингэн ууршиж, лав болгон хувиргах арга хүн төрөлхтний цэвэр, аюулгүй орчинд амьдрах итгэл найдвар юм гэж үзэн ажил хэрэг болгохоор судалгааг анх санаачилсан гэж Сирилль Дюнан Блүүмберг агентлагт ярьжээ. Улмаар шингэн металын нөлөөгөөр энэхүү химийн урвал явагдахын зэрэгцээ цахилгаан нуман зуухаар ган төмрийг дахин боловсруулах боломжтой аж. Үр дүнд Кембрижийн цахилгаан гэж тодотгоод буй цемент бий болжээ. Нурааж буй барилгуудаас гарсан хаягдал бетоныг цуглуулж, бутлаад цементийг нь ялган авч ган дахин боловсруулахад шаардлагатай шохойн хайлуулагчийн оронд ашиглаж болно. Ингэснээр ган боловсруулах явцад гардаг хог хаягдал, бохирдлын хэмжээ буурна. Ган төмрийг ийнхүү цахилгаан зуухаар дахин хайлуулсны дараа хөргөж, буталснаас гарах илүүдлээр шинэ төрлийн цемент хийнэ. Туршилт хийж үзэхэд дахин боловсруулсан холимог нь энгийн бетонтой яг ижил химийн найрлагатай байсан аж. Өөрөөр хэлбэл бэхжүүлэгч чанартай шинэ төрлийн Портланд цементийг гаргаж авсан үг юм гэж профессор Жулиан Оллвүүд тайлбарлажээ. Хамгийн сонирхолтой нь хаягдал бетон, ган төмрийг ийнхүү дахин боловсруулахад шинэ бүтээгдэхүүн үйлдэврлэх зардалтай тэнцсэн байна. Сэргээгдэх эрчим хүчээр ажилладаг цахилгаан зуух ашиглах учир байгаль орчинд ч ээлтэй. Кембрижийн эрдэмтдийн тооцооллоор 2050 онд гэхэд 1.1 тэрбум цахилгаан цемент боловсруулах боломжтой гэжээ.