Сэтгэгдэл 0
Испани, Италийн аль, аль нь эхний тоглолтоо ялалтаар эхлүүлсэн бахдам амжилтаар Гелсенкирхэн хотод ирж байна. Италийн хувьд өмнөх тэмцээний аваргын цомоо хамгаалагч баг. Харин Испани бол энэ тэмцээнд аваргын цомоо хамгаалан дараалж түрүүлсэн анхны баг юм. Испанийн хувьд залуу авьяастнууд ихтэй баг бол Италийн хувьд яг торгон ирэн дээрээ яваа олон тоглогчтой баг гэж мэргэжилтнүүд дүгнэж байна. Хоёр улсын шигшээ баг түүхэндээ 39 удаа таарч тоглосноос Испанийн шигшээ 14, Италийн шигшээ 11 удаа ялалт байгуулж, 14 удаа эвийн гэрээ байгуулж байжээ. Оруулсан гоолын хувьд ч ойролцоо. Испаничууд 45 гоол оруулсан бол Италичууд 46 гоол оруулж байжээ.
ИСПАНИ
Испаничууд нээлтийн тоглолтоо Хорватын эсрэг тун давгүй хийсэн. Тэд ердөө эхний хагаст л тоглолтын хувь заяаг шийдчихсэн юм. Ялагдашгүй Армадагаас эхний хагас гурван гоол оруулсан билээ. Эхний тоглолтод Фабиан Руйз гоол, гоолын дамжуулалт өгч, Альваро Мората гоол оруулсан. Европын аваргын түүхэнд талбайд гарсан хамгийн залуу тоглогч болсон Ламин Ямал ердөө 16-хан насандаа гоолын дамжуулалт өгч түүхэнд үлдэж байна. Испаничууд одоогоос яг 12 жилийн өмнө Европын аваргын шигшээ тоглолтод Италитай таарч 4-0 онооны харьцаагаар бут ниргэж байсан түүхтэй. Испанийн шигшээ багийн хувьд бүх тэмцээнийг оролцуулаад сүүлийн таван тоглолтод нэг хожигдон, нэг тэнцэж, гурван тоглолт дараалж ялалт байгуулаад байна. Тэд энэ хугацаанд 16 гоол оруулж, ердөө таван гоол хаалгандаа алдсан формтойгоор Гелсенкирхэнд ирээд байна.
ИТАЛИ
Италичуудын хувьд тэмцээний эхлэл тийм ч сайн байгаагүй. Европын аваргад ердөө хоёр дахь удаагаа оролцож байгаа Албанийн шигшээд эхний гоолыг алдсан. Европын аваргын түүхэнд хамгийн хурдан хугацаанд хаалгандаа гоол алдсан Италийн шигшээ 10 минутын дараа Бастонигийн гоолоор тэнцүүлж, тэнцээний гоолоор таван минутын дараа Бареллагийн гоолоор тэргүүллийг авсан билээ. Тоглолт яг энэ дүнгээрээ өндөрлөсөн. Эхний тоглолтын дараа Италийн хэвлэлүүдийн зарим нь шигшээ багаа шүүмжилсэн хэд, хэдэн нийтлэл бичсэн билээ. Италийн шигшээ баг бүх тэмцээнийг оролцуулаад сүүлийн таван тоглолтод нэг ч хожигдоогүй формтой байна. Тэд дөрвөн удаа ялалт байгуулж, нэг удаа тэнцжээ. Италийн шигшээ энэ хугацаанд 7 гоол оруулж, хоёр л гоол хаалгандаа алдаад байна. Итали хэв маягийн хамгаалсан, хамгаалалтаас сөрөг довтолгоонд шилждэг тоглолт үр дүнгээ өгч байгааг энэ статистикаас харж болно.
Дасгалжуулагч юу хэлэв?
Испанийн дасгалжуулагч Луйс де ла Фуенте: “Бид том тэмцээн бүрд учраа таардаг. Испани-Итали бол сонгодог тоглолт үзүүлдэг баг. Манай хоёр багийн алинд нь ч дэлхийн хөлбөмбөгийн гайхалтай соёл, чадвартай тамирчид бий. Гайхалтай багийн эсрэг чадах бүхнээ хийх болно”
Италийн дасгалжуулагч Лучиано Спалетти: “Манай хоёр баг том тэмцээний шигшээ, хагас шигшээд байнга шахуу учраа таардаг. Бидний тоглолтын хэв маяг өмнөх тоглолтынхоос өөрчлөгдөхгүй. Испани бөмбөг авах л юм бол бидэнд гай тарих чадвартай баг. Тиймээс аль болох бөмбөг бага өгч, хамгаалалтын зохион байгуулалтаа алдахгүйг хичээх болно”
Италийн дасгалжуулагч Лучиано Спалетти: “Манай хоёр баг том тэмцээний шигшээ, хагас шигшээд байнга шахуу учраа таардаг. Бидний тоглолтын хэв маяг өмнөх тоглолтынхоос өөрчлөгдөхгүй. Испани бөмбөг авах л юм бол бидэнд гай тарих чадвартай баг. Тиймээс аль болох бөмбөг бага өгч, хамгаалалтын зохион байгуулалтаа алдахгүйг хичээх болно”
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд SHUGELULEEGCH.mn хариуцлага хүлээхгүй.