Словени, Сербийн хувьд нөхцөл байдал харьцангуй өөр байна. Сербийн хувьд эхний тоглолтоо Англитай хийж харамсалтай нь хожигдсон. Харин Словенийн тухайд Данийн шигшээ багтай эвийн гэрээ байгуулсан. Энэ хоёр багийн аль, аль нь хожигдох эрхгүй талбайд гарч байна. Хоёр баг түүхэндээ найман удаа учраа таарч хоёул нэг, нэг удаа ялалт байгуулсан. Харин зургаан удаа эвийн гэрээгээр өндөрлөжээ. Үүнээс Словени 11 гоол оруулсан бол Сербчүүд 13 гоол оруулсан юм.
 

СЛОВЕНИ

Словеничүүдийн хувьд урам зориг дүүрэн байна. Учир нь зүүн жигүүрийн хамгаалагч Эрик Янзагийн хүчтэй цохилтоор Данийн багтай тэнцсэн. Эхний тоглолтын дараа Словенийн Дело сонин “Германд мөрөөдлөө биелүүлэх эхний алхмаа хийлээ” гэж бичсэн юм. Словенийн хувьд бүх тэмцээнийг оролцуулаад сүүлийн таван тоглолтод гурав тэнцэж, хоёр ялалт байгуулсан, нэг ч хожигдолгүй формтой байна. Хамгийн гол нь сүүлийн 13 тоглолтод Словенийн шигшээ ямар нэгэн байдлаар өрсөлдөгчийнхөө хаалганд гоол оруулжээ. Тэд сүүлийн таван тоглолтод зургаан гоол оруулж, таван гоол оруулсан байна. Ямар нэгэн байдлаар хамгаалалт учраа олчихвол тэд үнэхээр мөрөөдлөө амьд үлдээж мэдэх юм.

СЕРБИ

Серби эхний тоглолтоо энэ тэмцээнд түрүүлэх багуудын эгнээнд жагсаж буй Английн багтай хийж 1-0 онооны харьцаагаар хожигдсон. Эхний үе бүхэлдээ Английн шигшээн давамгайлал дор өрнөсөн ч хоёрдугаар хагаст Сербүүд гайхалтай олон довтолгоо хийсэн ч төгсгөж чадаагүй. Олон гоолын зөрүүгээр бус ердөө нэг гоол хаалгандаа алдсан нь тэднийг хүчтэй байгааг харуулна гэж Сербийн хэвлэлүүд мэдээлсээр байна. Ямартаа ч Тадич, Митрович, Влахович нар байгааг мартаж болохгүй. Сербийн шигшээ багийн хувьд форм тун тааруу байна. Тэд сүүлийн таван тоглолтод гурав ялагдаж, хоёр ялалт байгуулсан. Тэд өрсөлдөгчийнхөө хаалганд зургаан гоол оруулж, долоог хаалгандаа алджээ. Хагас хамгаалалт болон хамгаалалтын шилжилтүүд учраа олчихвол өрсөлдөгчөө хожих потенциаль бийг мэргэжилтнүүд хэлж байна.
 

Дасгалжуулагч юу гэж хэлэв?

Словенийн дасгалжуулагч Матжай Кек: “Бид эерэг дүнд хүрч, энэ тэмцээнд зүй ёсоор оролцох баг шүү гэдгээ батлан харуулах явдал юм. Бид минутаас минутад өсөж байгаа. Эхний тоглолтдоо тэнцсэн, цаашид хөгжөөн дэмжигчдийнхээ урмыг хугалахгүйн тулд бүх нөөцөө дайчилна”

Сербийн дасгалжуулагч Драган Стойкович: “Хүн бүр урам зоригтой байна. Бидэнд ялалт бүхнээс илүү чухал. Словенийн эсрэг бид тоглоход бэлэн байна. Английн шигшээтэй тоглоход хэтэрхий сүрдсэн. Одоо бид тэгэхгүй, дайчин тоглох болно”