Дэлхийн өрсөлдөх чадварын тайланд Монгол Улс 67 улсаас 61 дүгээрт эрэмбэлэгджээ. Монгол Улс өмнөх оныхоос нэг байр ахиж, Өмнөд Африкийн хойно, Бразилын өмнө 61 дүгээрт бичигдсэнээр 2018 оноос хойш тасралтгүй буурсан үзүүлэлтээ бага ч атугай ахиулжээ. Монгол Улс эдийн засгийн чадамж гэх үзүүлэлтээр 18 байр ахисан байна. Ийнхүү өсөх болсон нь дотоодын эдийн засгийн нөхцөл, олон улсын худалдаа, төсвийн тэнцэл ашигтай гарсан болон хөрөнгийн хуримтслал, урсгал дансы үлдэгдэл өссөн зэрэг үр дүнгүүр эерэгээр нөлөөлжээ. Хэдий тийм боловч бизнесийн үйл ажиллагааны ашиг, дэд бүтэц гэсэн ерөнхий үзүүлэлтээр сул үнэлгээ авчээ. Тайланд хамрагдсан 67 улсаас сүүл мушгисан дэд үзүүлэлтүүд бол бохирдол, мэдлэг солилцох байдал зэрэг нь хамгийн доогуур үнэлэгдэж байна.

Дэлхийн өрсөлдөх чадварын дүгнэлт хэсэгт дурдсанаар Монгол Улсыг энэ онд төсвийн тэлэлт, популист амлалтаас шалтгаалсан инфляцын өсөлт, нүүрсний экспортын биет хэмжээ буурч, үнийн дүн буурснаар эдийн засгийн томоохон сорилт ирж болзошгүй гэж дүгнэжээ.

Улс орнуудын эдийн засгийн хамгийн өргөн хүрээний мэдээллийг багтаадаг судалгааны нэг нь Дэлхийн өрсөлдөх чадварын тайлан юм. Дэлхийн өрсөлдөх чадварын судалгааны төвөөс сүүлийн 35 жилийн турш жил бүр гаргаж ирсэн бөгөөд тухайн улсын дата мэдээллийн олдоц, эдийн засгийн нөлөөлөх чадвар, тогтвортой байдал, харьцуулагдах боломжийг харгалзан харьцангуй цөөн улсыг тайлан судалгаанд хамруулдгаараа онцлог юм.