Германы Мюнхен хотноо орон нутгийн цагаар 20 цагт эхлэх Европын хөлбөмбөгийн аварга шалгаруулах тэмцээний нээлтийн ёслолд нэрт хөлбөмбөгч Франц Беккенбауэрийн дурсгалыг хүндэтгэхээр болжээ. Европын хөлбөмбөгийн холбооны мэдээлснээр нээлтийн ёслолд Германы шигшээ багийн хамтаар европын аварга болж байсан Бернард Дайтц (1980), Юрген Клинсманн (1996), Беккенбауэрийн гэргий Хайди нар аваргын цомыг барьж цэнгэлдэхэд орж ирэх юм.

Эзэн хаан буюу “Кайзер” хочит Франц Беккенбауэр төвийн хамгаалалтын өнгө төрхийг өөрчилж, хамгаалалтын шугамд орчин цагийн хэв маяг авчирснаараа онцлог. Ялангуяа хамгаалалтаас довтолгоо эхлүүлдэг төвийн хамгаалагчийн либеро стилийг үндэслэсэн гэдгээрээ алдартай. Тэрбээр хөлбөмбөгчийн хувиар 1974 оны Дэлхийн аварга, 1972 оны Европын аваргад түрүүлж, дасгалжуулагчийн хувиар Баруун Германы хамтаар 1990 оны Дэлхийн аваргад түрүүлж хөлбөмбөгийн спортод нэрээ дархалсан юм. Франц Беккенбауэр нь 1998 онд 20-р зууны дэлхийн баг, 2002 онд ДАТШ-ний мөрөөдлийн баг, 2020 онд Дэлхийн шилдэг хөлбөмбөгчдийн бэлгэдлийн шигшээ, бүх цагийн шилдэг 100 тоглогчоор нэрлэгдэж байсан билээ. Тэрбээр 2024 оны нэгдүгээр сарын 7-ны өдөр насан эцэслэсэн юм.