Оны эхний улиралд Монгол Улсын гадаадын шууд хөрөнгө оруулалт мэдэгдэхүйц нэмэгдэж 885 сая ам.долларт хүрчээ. Энэ нь өнгөрсөн оныхоос даруй 73% өссөн үзүүлэлт гэж Эдийн засаг, хөгжлийн яамны мэдээлэлд дурджээ.

Нийт ГШХО-ын 79% нь уул уурхайн салбарт, 8% нь шинжлэх, технологийн салбарт, 6% нь худалдааны салбарт, 3% нь санхүү, даатгалын салбарт, үлдсэн хувь нь тээвэр, мэдээлэл холбооны салбар зэрэг 15 салбарт хамаарч байна. Үүнээс харахад түүхий эдийн зах зээл дээр огцом өсөлттэй байсан зэсийн салбар болон бусад салбарын өсөлт нь уул уурхайн ашгийг нэмэгдүүлсэн бөгөөд ГШХО ч үүнийгээ дагаад нэмэгджээ. Дэлхийн голлох уул уурхайн экспертүүд зэсийн эрэлт нэмэгдэхээс гадна алт зэрэг үнэт металын ханш ч тогтмол байхыг анхааруулсан юм.