Өнгөрсөн сард тонн тутамдаа 11 мянган ам.доллароос давж, түүхэн амжилт тогтоогоод байсан зэсийн ханш буурч эхэлсэн тухай санхүүгийн шинжилгээний агентлагууд мэдээллээ. Ийнхүү буурч байгаа нь дэлхий даяар зэсийн нөөц эрс нэмэгдсэнтэй холбоотой гэж мэргэжилтнүүд үзэж байна. Зэсийн ханш яг одоо тонн тутамдаа 10.09 мянган ам.доллароор хэмжигдэж байна. Санхүүгийн алдарт Financial Times сэтгүүлийн мэдээлснээр Шанхайн биржид зэсийн нөөц 2020 оноос хойш дээд цэгт хүрчээ. Өмнөх жилүүдийн практикаас харвал жилийн энэ үед зэсийн олборлолт буурдаг ч Азийн томоохон агуулахуудад нийлүүлэх зэсийн нийлүүлэлт тогтмол нэмэгдсээр байна.

Зэсийн ханш буурах дараагийн том шалтгаан нь АНУ-ын дотоодын эдийн засгийн нөхцөл байдал болоод байна. Учир нь АНУ-ын ажилгүйдлийн түвшин тогтвортой буурч, идэвхтэй ажил хайгчдын тоо нэмэгдэж байгаа нь эдийн засгийн хувьд сайн мэдээний нэг юм. Үүнтэй холбоотойгоор санхүүгийн шинжээч нар АНУ-ын Холбооны нөөцийн банк энэ онд багтаан бодлогын хүүг буулгах магадлалтай гэж таамаглаж байна. Цаашид ойрын хоёр сардаа зэсийн ханш буурах төлөвтэй байгааг санхүүгийн агентлагууд мэдээлжээ.