УИХ-ын Байгаль орчин, хүнс, хөдөө аж ахуйн байнгын хорооноос зохион байгуулсан “Хүнс, хөдөө аж ахуй, хөнгөн үйлдвэрийн салбарт төрөөс олгож байгаа дэмжлэг, урамшуулал, Засгийн газраас хариуцан төлж байгаа зээлийн хүүгийн татаас олголтын байдал, хэрэгжилт’’ сэдэвт ерөнхий хяналтын сонсголын үеэр “Тариалаагүй манжинг тарьсан гэж 1.2 тэрбум төгрөгийн урамшуулал авсан асуудлыг цагдаагийн байгууллагад шалгаж байгаа” гэсэн асуудал хөндсөн. Уг хэргийг ЭЦА-ныхан шалгаж дуусаад, прокурор яллах дүгнэлт үйлджээ.

Тодруулбал, Сэлэнгэ аймгийн иргэн Л.А, Э.У нар 2024 оны 8-11 дүгээр сард нэр бүхий хуулийн этгээд, иргэдэд шар манжин худалдан борлуулсан хэмээн и-баримтыг хуурамчаар үүсгэж байж. Улмаар түүнийгээ ашиглан хүнсний ногооны урамшуулалд хамрагдсан гэнэ. Хүнс, хөдөө аж ахуй, хөнгөн үйлдвэрийн сайдын мөнгөн бус дэмжлэг үзүүлэх журмыг зөрчиж, 2024 оны арванхоёрдугаар сарын 20-ноос 2025 оны хоёрдугаар сарын 24-ний хооронд иргэн Л.А нийт 2.2 тэрбум, Э.У нь 354 сая төгрөгийн урамшуулал хууль бусаар авчээ.

Тэдэнд Эрүүгийн хуулийн 18.7-1 дэх хэсгийн “Мөнгөн тэмдэгт, үнэт цаас, төлбөр тооцооны хэрэгсэл хуурамчаар бэлтгэж, ашигласан” гэх заалтыг үндэслэн яллагдагчаар татсан аж.