БНХАУ-ын Ганьсу мужийн Ланжоу хотод Монгол-Хятад-Оросын хамтарсан Экологи, инженерийн төв саяхан нээгджээ. Энэх үү төв нь хөрш гурван улсын шинжлэх ухаан, технологи инновацийн хамтын ажиллагааг өргөжүүлэх, бүс нутгийн байгаль орчин, инженерийн судалгааны ажилд шинэ дэвшил гаргах зоилготой юм.

Тус төвийг БНХАУ-ын ШУА-ийн харьяа Хятадын баруун хойд хэсгийн Экологийн орчин, нөөцийн хүрээлэн болон ШУА-ийн Газарзүй геоэкологийн хүрээлэн, ОХУ-ын ШУА-ийн Мельниковын нэрэмжит мөнх цэвдэг судлалын хүрээлэн хамтран байгуулжээ. БНХАУ-ын ШУА-ийн тэргүүлэгчид өнгөрөгч 2023 оны есдүгээр сард энэ төвийг байгуулахаар баримт бичиг үйлдсэн юм.
Гурван улсын хамтарсан экологи, инженерийн төвийн нээлтийн үйл ажиллагааны үеэр гурван улсын эрдэм шинжилгээний үйл ажиллагааг өргөжүүлж, эрдмийн үйл хэргийн солилцоог гүнзгийрүүлэх, магистр, аспирант бэлтгэх санамж бичигт гарын үсэг зуржээ. Санамж бичиг ёсоор гурван улс хамтран криосферийн өөрчлөлт, ус зүйн гамшгийн нөлөөлөл, мөнх цэвдэг бүхий газарт инженерийн үйл ажиллагаа эрхэлбэл байгаль орчинд үзүүлэх сөрөг нөлөөг судлах, цөлжилттэй тэмцэх, байгаль орны нөхөн сэргээлтэд  хамтран ажиллах юм.

Түүнчлэн Монгол Улсын Ерөнхийлөгчийн санаачилсан “Тэрбум мод” аяныг хөгжүүлэхэд арга зүйн зөвлөгөө үзүүлж, дэмжин ажллах юм байна.