Нийслэлийн иргэдийн Төлөөлөгчдийн Хурал дахь Ардчилсан намын бүлгийн ээлжит хуралдаан өнөөдөр /2026.09.10/ боллоо.

Хуралдаанаар НИТХ-ын Ээлжит бус XIV хуралдаанаар хэлэлцүүлэхээр өргөн мэдүүлсэн 12 асуудлыг хэлэлцэж, бүлгийн гишүүд санал, байр сууриа нэгтгэлээ.

Хуралдааны эхэнд Нийслэлийн төсвийн ерөнхийлөн захирагчийн 2025 оны төсвийн гүйцэтгэлийг батлах тухай асуудлыг хэлэлцэв. Нийслэлийн ЗДТГ-ын Санхүү, хөрөнгө оруулалтын газрын дарга Л.Эрдэнэбадрахын хийсэн танилцуулгатай холбогдуулан бүлгийн дарга Т.Батцогт төсвийн орлого бүрдүүлэлт, үнийн өсөлт, аж ахуйн нэгжүүдийн гүйцэтгэлийн санхүүжилт болон нийслэлийн хэрэгжүүлж буй ажилд тавьж буй хяналттай холбоотой асуудлаар тодруулж, санал хэлэв.

Мөн нийслэлийн дотоод үнэт цаас гаргах тухай асуудлыг хэлэлцэв. Дулааны V цахилгаан станц, батарей хураагуурын систем зэрэг эрчим хүчний төслийг санхүүжүүлэх зорилгоор дотоодын үнэт цаас гаргах талаар танилцуулсан бөгөөд НИТХ-ын төлөөлөгч Б.Золтуяа батарей хураагуурын системийн төслийн хэрэгцээ, шаардлага болон нийслэлийн эрчим хүчний хангамжтай уялдсан тооцоо, үндэслэлийн талаар тодруулсан юм.

Түүнчлэн Сэлбэ дэд төвийн төслийн хэрэгжилт, санхүүжилт, орон сууцны борлуулалт болон иргэдийн худалдан авах чадвартай холбоотой асуудлыг хэлэлцэв. Бүлгийн дарга Т.Батцогт төслийн хэрэгжилт, үр дүнг анхаарч, анх төлөвлөсөн зорилттой нь уялдуулан авч үзэх шаардлагатай талаар байр сууриа илэрхийлэв.

Хуралдаанаар “Нийслэлийн Засаг дарга бөгөөд Улаанбаатар хотын Захирагчийн 2024-2028 оны үйл ажиллагааны хөтөлбөр”-ийг шинэчлэн батлах тухай асуудлыг Нийслэлийн ЗДТГ-ын Бодлого, төлөвлөлтийн газрын дарга П.Хадбаатар танилцууллаа. Уг асуудалтай холбогдуулан НИТХ-ын төлөөлөгч Б.Золтуяа үйл ажиллагааны хөтөлбөрт өөрчлөлт оруулахдаа өмнөх хугацаанд хэрэгжүүлсэн ажлын үр дүн, судалгаа, шинжилгээнд үндэслэн тэргүүлэх чиглэлээ тодорхойлсон эсэхийг тодруулж, шинэчлэн батлах үндэслэл, тооцоо судалгааг тодорхой болгох шаардлагатай гэв.

Нийслэлийн ИТХ дахь АН-ын бүлэг НИТХ-ын ээлжит бус XIV хуралдаанаар хэлэлцэх төсөв, санхүү, өрийн удирдлага, эрчим хүч, хот байгуулалт болон үйл ажиллагааны хөтөлбөртэй холбоотой асуудлуудыг хэлэлцэж, гишүүдийн санал, байр суурийг нэгтгэн хэлэлцэхийг дэмжив.