Зам, тээврийн сайд Б.Дэлгэрсайхан Шувуун фабрик орчимд төмөр замын трасст өртсөн, хохирсон хэмээн гомдол мэдүүлж, тэр хэсгийн ажлыг түр саатуулаад буй оршин суугч, иргэдтэй уулзаж, санал хүсэлтийг нь сонслоо.

Уулзалтын үеэр газар чөлөөлөлт, нөхөн олговрын асуудлыг хууль тогтоомжийн хүрээнд, иргэдийн эрх ашгийг хамгаалах зарчмаар шийдвэрлэнэ гэсэн байр суурийг илэрхийллээ.

Мөн төмөр замын трассын байршил, зураг төсөл, бүтээн байгуулалтын шийдлийг иргэдэд дэлгэрэнгүй танилцуулж, төмөр замын трасс болон маршрутад өртсөн зарим айлын газар, хашаа, малын саравч хороог үзэж танилцлаа.

Ингэхдээ тухайн бүсийн иргэдэд нийслэлийн газрын алба болон хараат бус үнэлгээний компаниудаар тухайн иргэдийн газар, үл хөдлөх хөрөнгийн үнэлгээг хууль журмын дагуу хийлгэж, үнэлгээний дүнд үндэслэн нөхөн олговрыг шийдвэрлэж ажиллахаа илэрхийллээ.

Мөн иргэдийн саналд үндэслэн өөр байршилд дүйцүүлэн газар олгох боломжийг шуурхай судалж, холбогдох шийдвэрийг хууль тогтоомжийн хүрээнд гаргана. Сайдын зүгээс төмөр замын бүтээн байгуулалтын ажилтай 7 хоногт 2-3 удаа ирж ажиллаж байгаа тул шаардлагатай асуудлаар тухай бүр зөвлөлдөж, санал солилцож болно гэлээ гэж Зам, тээврийн яамнаас мэдээллээ.