Монгол Улс НҮБ-ын Цөлжилттэй тэмцэх тухай конвенцын Талуудын 17 дугаар бага хурал (COP17)-ыг 2026 оны наймдугаар сарын 17–28-ны өдрүүдэд Улаанбаатар хотноо зохион байгуулна.

Энэ хүрээнд Монгол Улсын Засгийн газрын хэлэлцээний багийн мэдлэг, ур чадвар, удирдан чиглүүлэх чадавхыг бэхжүүлэх зорилгоор “COP17 Ахисан түвшний хаалттай сургалт-хэлэлцүүлэг”-ийг Байгаль орчин, уур амьсгалын өөрчлөлтийн яам, Гадаад харилцааны яам, НҮБ-ын Цөлжилттэй тэмцэх тухай конвенцын Нарийн бичгийн дарга нарын газар болон Олон талт хэлэлцээний төв (CEMUNE) хамтран зохион байгуулж байна.

Сургалт-хэлэлцүүлгийг нээж Байгаль орчин, уур амьсгалын өөрчлөлтийн сайд Ц.Сандаг-Очир хэлсэн үгэндээ, COP17-г даргалагч улс нь зөвхөн хурлыг зохион байгуулах үүрэгтэй бус, хэлэлцээний үйл явцыг шударга, ил тод удирдан чиглүүлж, өөр өөр байр суурьтай улс орнуудын хооронд зөвшилцөл бий болгох, харилцан итгэлцлийг бэхжүүлэх, бодлогын шийдвэрүүдийг урагшлуулахад голлох үүрэгтэй гэдгийг онцлон тэмдэглэлээ.

Мөн газрын доройтол, ган, цөлжилт, уур амьсгалын өөрчлөлт, усны аюулгүй байдал болон эдгээр сорилтыг даван туулахад шаардлагатай санхүүжилтийн асуудал нь өнөөдөр дэлхийн тогтвортой хөгжлийн хэлэлцээний тэргүүлэх сэдвүүдийн нэг болоод байгааг дурдав.

Ийм нөхцөлд Монгол Улс COP17-ын даргалагч орны хувьд олон талт хэлэлцээг үр дүнтэй ахиулж, талуудын нийтлэг ойлголцлыг бэхжүүлэх, олон улсын хамтын ажиллагааг шинэ шатанд гаргах дипломат манлайллаа харуулах нь онцгой ач холбогдолтой болохыг тэрбээр онцолсон юм.

Олон талт хэлэлцээний төв (CEMUNE) нь олон улсын томоохон хэлэлцээ, дээд түвшний уулзалтуудыг даргалагч улс орнууд болон хэлэлцээний үйл явцыг чиглүүлэгч талуудад хараат бус, мэргэжлийн дэмжлэг үзүүлдэг ашгийн төлөө бус байгууллага юм.

Тус төв нь НҮБ-ын Уур амьсгалын өөрчлөлтийн суурь конвенц (UNFCCC)-ын Талуудын бага хурлыг даргалагч орнуудад олон жилийн турш стратегийн зөвлөх үйлчилгээ үзүүлж ирсэн туршлагатай бөгөөд өдгөө Биологийн олон янз байдлын тухай конвенц (CBD), НҮБ-ын Цөлжилттэй тэмцэх тухай конвенц (UNCCD)-ын даргалагч талуудтай мөн хамтран ажиллаж байна.

Мөн Засгийн газар болон даргалагч талуудтай нягт хамтран ажиллаж, олон талт хэлэлцээний үр нөлөөг нэмэгдүүлэх, байгаль орчин болон хүн төрөлхтний тогтвортой ирээдүйд чиглэсэн хамгийн оновчтой, үр ашигтай шийдвэрүүдийг гаргахад дэмжлэг үзүүлэхийг зорьдог гэж Байгаль орчин, уур амьсгалын өөрчлөлтийн яамнаас мэдээллээ.