Авлигатай тэмцэх газрын Хяналт шалгалт, дүн шинжилгээний хэлтэс нь 2026 оны 7 дугаар сарын 20-24-ний өдрүүдэд нийтийн албанд томилогдохоор нэр дэвшсэн 405 иргэний хувийн ашиг сонирхлын урьдчилсан мэдүүлгийг шалгаж, 260 мэдүүлгийг хянан шийдвэрлэв. Одоогоор ажиллагаанд 145 нэр дэвшигчийн урьдчилсан мэдүүлэг хянагдаж байна.

“Уур амьсгалын өөрчлөлтийн судалгаа, хамтын ажиллагааны төв” ТӨААТҮГ, Чингэлтэй дүүргийн ЗДТГ, “Дундговь аймгийн Сайнцагаан сумын болон Архангай аймгийн Хотонт сумын ЗДТГ зэрэг байгууллагуудын холбогдох албан тушаалд томилогдохоор нэр дэвшсэн нийт 7 этгээд нь тухайн албан үүргийг гүйцэтгэхэд илт ашиг сонирхлын зөрчил үүсэх нөхцөл байдал тогтоогдсон талаар томилох эрх бүхий албан тушаалтанд хариу мэдэгдэв.

Өнгөрсөн хугацаанд иргэн, аж ахуйн нэгж, байгууллагаас ирүүлсэн нийтийн албан тушаалтны авлига, ашиг сонирхлын зөрчилтэй холбоотой 98 гомдол, мэдээллийг хүлээн авч шалгаснаас 18 гомдол, мэдээллийг хянан шийдвэрлэв.

Төлөвлөгөөт хяналт шалгалтаар 3 албан тушаалтны хувийн ашиг сонирхлын болон хөрөнгө, орлогын мэдүүлгийг хянан шалгав гэж АТГ-аас мэдээллээ.