Дэлхийн санхүүгийн хэд, хэдэн байгууллагууд ам.долларын ханш чангарч байгаа нь хөгжиж буй орнуудад инфляц өсөх, цаашлаад эдийн засгийн богино хугацааны хямрал үүсгэх эрсдэлтэй байгааг онцолж байна. Тухайлбал АНУ-ын Goldman Sachs компани дүгнэлтдээ “Ам.долларын ханшийн өсөлт хөгжиж буй орнуудад дарамт болох эрсдэлтэй байна” гэжээ. Оны эхнээс нь ам.долларын ханш чангарсан нь АНУ-ын эдийн засгийн өсөлт өндөр байсантай холбоотой. Гэхдээ хэрэглээний үнийн индекс өндөр хэвээр байсан тул АНУ-ын Холбооны нөөцийн банк мөнгөний хатуу бодлого баримталсаар байгаа юм. Энэ нь зөвхөн эдийн засагт нөлөөлөөд зогсохгүй гол түүхий эдүүдийн ханш өсөх хамгийн том шалтгаан болсон билээ.

Түүнчлэн ам.долларын ханш чангарсан нь Индонези, Өмнөд Солонгос, Хятад зэрэг улс орнуудад маш том сорилт болно гэж дүгнэсэн байна. Дээрх улсууд нь технологи болон уул уурхайн экспортоор тэргүүлдэг улс орнууд юм. Тэр дундаа БНХАУ-ын эдийн засгийн өсөлтийн удаашрал Монгол Улсад сорилт болж болзошгүй.

Энэ долоо хоногийн эхээр Дэлхийн банк Монгол улсын эдийн засагт эрсдэл байгааг анхааруулаад төсвийн тэлэлтээс сэргийлэх, дунд хугацааны инфляцын өсөлтөөс хамгаалах бодлого баримтлахыг Засгийн газарт анхааруулсан юм. Ялангуяа сонгууль ойртох тусам бэлэн мөнгө болон цалин тэтгэвэр өсгөх бодлого баримталдаг нь эдийн засгийн бодлогод сөргөөр нөлөөлдөг гэдгийг статистик тоо баримтууд бэлхнээ харуулна.