Засгийн газрын Хяналт хэрэгжүүлэх газраас төрийн байгууллагуудын бодлого, хууль тогтоомжийн хэрэгжилтийн явцад тулгарч буй нийтлэг асуудал, зөрчил, төрийн бүтээмж, процессын дахин инженерчлэл, хяналт-шинжилгээ, үнэлгээ болон эрсдэлийн удирдлагын талаарх мэдлэг ойлголтыг нэмэгдүүлэх, мэргэжил арга зүйн зөвлөгөө өгөх зорилготой уулзалтыг Хөвсгөл аймгийн Мөрөн хотод зохион байгуулж байна.

 

Уулзалтад Хөвсгөл, Орхон, Булган аймгийн төрийн байгууллагын удирдлагууд, хяналт-шинжилгээ, үнэлгээ, стратеги төлөвлөлт, эрсдэлийн удирдлага хариуцсан 200 гаруй төрийн албан хаагч оролцож байна.

 

Арга хэмжээг нээж Засгийн газрын Хяналт хэрэгжүүлэх газрын дарга бөгөөд Ерөнхий хянан шалгагч П.Батбаатар “Засгийн газар дахь хяналтын тогтолцоо” сэдвээр мэдээлэл хийж, төрийн байгууллагуудын бодлого, шийдвэрийн хэрэгжилтэд тавих хяналтын тогтолцоог боловсронгуй болгох, төрийн байгууллагын хариуцлага, үр нөлөө, бүтээмжийг дээшлүүлэх чиглэлээр хэрэгжүүлж буй ажлуудыг танилцууллаа.

 

Мөн Хөвсгөл аймгийн Засаг дарга Л.Төмөрбаатар оролцогчдод хандан үг хэлж, орон нутгийн төрийн байгууллагуудын уялдаа холбоог бэхжүүлэх, хяналт-шинжилгээ, үнэлгээний тогтолцоог сайжруулах, төрийн үйлчилгээг иргэдэд илүү үр дүнтэй, хүртээмжтэй хүргэхэд хамтын оролцоо чухал болохыг онцлон тэмдэглэв.

 

Үдээс хойш Хөвсгөл, Орхон, Булган аймгийн төрийн байгууллагын төлөөлөлтэй тусгайлсан уулзалтууд зохион байгуулж, аймаг тус бүрийн онцлог нөхцөл байдал, тулгамдаж буй асуудал, хяналт-шинжилгээ, үнэлгээ, стратеги төлөвлөлт болон эрсдэлийн удирдлагын чиглэлээр хэрэгжүүлж буй ажлын талаар санал солилцож, цаашид авч хэрэгжүүлэх арга хэмжээний талаар хэлэлцэх юм гэж Засгийн газрын Хяналт хэрэгжүүлэх газраас мэдээллээ.