"Хөдөө аж ахуйн бирж" ТӨХХК, Монголын арьс ширний үйлдвэрлэлийн холбоо, Хэнтий аймгийн Хөдөө аж ахуйн хоршоологчдын холбоотой хамтран арьс ширний салбарын өнөөгийн нөхцөл байдал, тулгамдаж буй асуудал, цаашдын хөгжлийн боломжийг хэлэлцэх уулзалт, сургалтыг Хэнтий аймагт зохион байгууллаа.
Уулзалтад орон нутгийн хоршоод, малчид, боловсруулах үйлдвэрийн төлөөлөл оролцож, арьс ширний үнэгүйдэл, түүхий эдийн чанар, хадгалалт, тээвэрлэлтийн хүндрэл, эдийн засгийн эргэлтэд оруулах боломжийн талаар санал солилцов. Мөн малчдын орлогыг нэмэгдүүлэх, түүхий эдийн үнэ цэнийг өсгөх, боловсруулах үйлдвэрлэлийн уялдаа холбоог сайжруулах чиглэлээр хэрэгжүүлэх ажлуудын талаар хэлэлцлээ.
Тус уулзалтад "Мон Ирээдүй" ХХК, "Булигаар ХК", "Их Эргэлт ХХК" болон арьс ширний салбарын үйлдвэрүүдийн төлөөлөл оролцож, Монгол Улсын арьс ширний салбарыг олон улсын стандартад нийцүүлэн хөгжүүлэх, үйлдвэрүүдийг LWG олон улсын гэрчилгээтэй болгох, тогтвортой гарал үүслийн бүс байгуулах, “Бэлчээрээс бүтээгдэхүүн хүртэл” нэмүү өртгийн цогц сүлжээг бүрдүүлэх асуудлыг онцлон танилцууллаа.
Мөн Засгийн газрын “Цагаан алт” үндэсний хөтөлбөрийн хүрээнд арьс ширний экспортын зорилтыг хэрэгжүүлэх, малчдын бэлтгэж буй түүхий эдийн чанар, үнэ цэнийг нэмэгдүүлэх зорилгоор улсын хэмжээнд сонгогдсон таван суманд дараах чиглэлээр үе шаттай ажил хэрэгжүүлж байгааг мэдээлэв. Үүнд:
• Малын гаралтай өвчлөл, паразитын асуудлыг бууруулах,
• Арьс ширийг стандартын дагуу бэлтгэх, ангилах, хадгалах, тээвэрлэх тогтолцоог бүрдүүлэх,
• Түүхий эдийн анхан болон ахисан шатны боловсруулалтыг хөгжүүлэх,
• Эдийн засгийн эргэлтээс гарсан арьс ширийг дахин эргэлтэд оруулах нөхцөлийг бүрдүүлэх юм.
Түүнчлэн хуучны худалдаа, бэлтгэлийн ангийн тогтолцоог орчин үеийн хэрэгцээ шаардлагад нийцүүлэн шинэчлэх, нядалгааны үеийн гэмтэл, исгэлт, тээвэрлэлтийн хүндрэл зэрэг арьс ширний чанарт сөргөөр нөлөөлдөг суурь асуудлуудыг шийдвэрлэхэд онцгойлон анхаарч ажиллаж байгааг онцоллоо.
Эргэн сануулахад, ХХААХҮ-ийн сайд Ц.Идэрбат Монголын арьс ширний үйлдвэрлэлийн холбоо (МАШҮХ)-ны Ерөнхийлөгч А.Даваасүрэнтэй уулзах үеэрээ дотоодын арьс шир боловсруулах, экспортод нийлүүлэх ач холбогдлыг онцгойлон анхаарч, арьс ширний 23 үйлдвэрийг үе шаттайгаар Эмээлтэд нүүлгэн шилжүүлэх, үнэгүйдээд буй арьсыг эдийн засгийн эргэлтэд оруулан малчдын орлогыг нэмэгдүүлэх, Эмээлт эко АҮП-ийн бүтээн байгууулалтыг эрчимжүүлэн ажиллахаа илэрхийлсэн юм.
Энэхүү хамтын ажиллагаа нь малчдын орлогыг нэмэгдүүлэх, үндэсний үйлдвэрлэлийн өрсөлдөх чадварыг сайжруулах, экспортын боломжийг өргөжүүлэх, арьс ширний салбарын тогтвортой хөгжлийг дэмжихэд чухал ач холбогдолтой.