Дэлхийн банкнаас хагас жил тутам эрхлэн гаргаж буй Монголын эдийн засгийн тойм тайланд дурдсанаар эдийн засаг сэргэж байгаа ч гадаад орчны эрсдэл хэвээр байгааг дурджээ. Тус тайланд дурдсанаар эдийн засаг 4.8% өсөх төлөвтэй байна. Гэвч эдийн засгийн хэтийн төлөвт сөргөөр нөлөөлж болзошгүй хэд, хэдэн эрсдэл бий гэж дүгнэжээ. Тухайлбал, БНХАУ-д эдийн засгийн өсөлт хүлээлтээс удааширвал Монголын экспортын эрэлт саарч болзошгүй. Мөн геополитикийн хурцадмал байдлаас шалтгаалан импортын түлш, шатахууны үнэ нэмэгдэх магадлалтай ч онцолсон байна.

Дотоод эрсдэл гэвэл Монгол Улсын хэмжээнд 2010 оноос хойш хамгийн олон тооны мал хорогдсон зудын гамшиг хөдөө аж ахуйн салбарт сөргөөр нөлөөлөхөөр байна. Макро түвшинд харвал төсвийн тэлэлт, өрхийн орлогын өсөлт зэрэг нь 2024 онд инфляцын дарамтыг нэмэгдүүлж болзошгүй гэж дүгнэсэн байна.

Монгол Улсын эдийн засаг 2023 онд 7.1% өсөхөд нүүрсний олборлолт,тээвэрлэлт эрчимсэн нь голчлон нөлөөлсөн. Цаашид “Оюу Толгой”-н олборлолт нэмэгдсэнээр 2025-2026 онд эдийн засгийн өсөлт 6.4% орчимд байх төлөвтэй. Энэ нь дунд хугацааны өсөлтийн төлөв эерэг хэвээр байгааг тус тайланд дурджээ.