Сэлбэ 20 минутын хот төсөл нь нийслэлийн Сүхбаатар дүүргийн 14 дүгээр хороо, Чингэлтэй дүүргийн 14, 18 дугаар хорооны нутаг дэвсгэрт нийт 8575 айлын 113 блок орон сууцыг ашиглалтад оруулахаар ажиллаж байгаа билээ. 

Төсөл нь дөрвөн багц, долоон хэсэгт хуваагдан хэрэгжиж байгаа бөгөөд орон сууцны бүсэд 113 блок бүхий 8,575 айлын орон сууц баригдаж байгаагаас 100 блокын барилга угсралтын ажил эхлээд байна. Барилгын ажил багц тус бүрээр төлөвлөгөөний дагуу явагдаж, зарим хэсэгт 6-7 давхрын угсралт амжилттай өрнөж байгаа юм. Энэ оны долдугаар сар гэхэд барилга угсралт дуусаж, гадна фасадны ажил эхлэх төлөвлөгөөтэй байна. Сэлбэ дэд төвийн нийт гүйцэтгэл 32.6 хувьтай байгаа бөгөөд 2026 онд гүйцэтгэл 65 хувьд хүрэхээр зорин ажиллаж байгаа юм. 

Одоогийн байдлаар төслийн талбайд 2258 гаруй инженер, техникийн мэргэжилтэн 130 орчим техник хэрэгсэлтэйгээр ажиллаж байгаа бөгөөд нийт гүйцэтгэгч болон бараа материал нийлүүлэгчдийн 60-70 хувь нь үндэсний аж ахуйн нэгжүүд байгаа нь дотоодын эдийн засгийг дэмжихэд бодит хувь нэмэр оруулж байна.
Төслийн нийт талбай 158 га бөгөөд үүний 36.8 хувийг ногоон байгууламж эзлэхээр төлөвлөжээ. Мөн 960 хүүхдийн нэг сургууль, 1260 хүүхдийн нэг сургууль, 1560 хүүхдийн нэг сургууль тус тус баригдах бөгөөд 240 хүүхдийн хүчин чадалтай таван цэцэрлэг байгуулагдана. Үүнээс гадна 39,800 м² талбай бүхий дөрвөн авто зогсоол, 91 байршилд хог цуглуулах цэг, нийт 72.6 км урттай явган болон дугуйн замыг төлөвлөсөн байна.

“Сэлбэ 20 минутын хот” төсөл бүрэн хэрэгжсэнээр 15,000 нүхэн жорлон устаж, гэр хорооллоос үүдэлтэй хөрсний бохирдол 6 хувиар буурах тооцоо гарчээ. Мөн 12,000 яндан байхгүй болсноор агаарын бохирдол 7.7 хувиар, хөрсний эвдрэл 2.1 хувиар буурах юм. Үүнээс гадна гадаргын усны урсацыг орон зай, цаг хугацааны хүчин зүйлтэй уялдуулан хиймэл нуур, усан сан, цөөрөм, хүнхээл байгуулж, байгаль экологийн таатай орчин бүрдүүлэхээр төлөвлөсөн байна.