2012 онд Ши Жиньпин эрх барих болсноосоо хойш Хятадын Коммунист Намын (ХКН) бүх шатны байгууллагад авлигыг үндсээр нь устгана гэж амласан билээ. Түүнээс хойш арав гаруй жил өнгөрсөн ч авлигын эсрэг мөрдөн шалгах ажиллагааны эрч сулраагүй хэвээр байна.

Өнгөрсөн онд Хятадын сахилга хариуцлагын байгууллагууд нэг сая гаруй хүнийг, түүний дотор сайд эсвэл мужийн түвшний (болон түүнээс дээш албан тушаалтай) 100 гаруй албан тушаалтныг шалгаж эхэлжээ. Энэ долоо хоногт болох чухал хуралд бэлтгэж буй ХКН-ын албан тушаалтнуудын хувьд сахилга бат, намынхаа өмнө хүлээсэн үнэнч байдал нь хэлэлцэх асуудлын гол цөм нь байна.

Хятадын дээд түвшний улс төрийн үйл явцыг ажиглан шинжилдэг хүмүүсийн үзэж байгаагаар, намын доторх сахилга батын дутагдалтай байдал нь ХКН-ын хэлэлцүүлгүүдэд гол сэдэв болон хөндөгдөж байгаа аж.  Хятадын төрийн мэдээллийн хэрэгслүүдийн мэдээлснээр "Тавдугаар бүгд хурал" (Fifth Plenum) нь "намын дотоод засаглалыг бүрэн дүүрэн, хатуу чанд бэхжүүлэхтэй холбоотой томоохон асуудлууд"-ад төвлөрөх ажээ. Намын хэллэгээр бол "засаглал" гэдэг нь сахилга бат, үнэнч байдал, авлигын эсрэг тэмцэл гэсэн утгыг илэрхийлдэг. Ши Жиньпин авлигын эсрэг тэмцлээ үргэлжлүүлж байгаа ч, мөрдөн шалгах ажиллагаа бараг үргэлж ял оноосноор төгсөж байгаа нь нэгэн асуултыг төрүүлж байна.

Шалгагдаж буй хүмүүс үнэхээр авлигад холбогдсон уу, эсвэл тэд зүгээр л эрх мэдэл бүхий хүмүүсийн улс төрийн өрсөлдөгчид юм болов уу. Лондонгийн Кингс коллежийн "Лау Хятад судлалын хүрээлэн"-гийн (Lau China Institute) захирал Керри Брауны тайлбарласнаар, сахилга бат, үнэнч байдлыг нэн тэргүүнд тавьдаг Ши Жиньпиний ертөнцийг үзэх үзэлд эдгээр хоёр ойлголтын хооронд ялгаа бараг байхгүй байж магадгүй гэжээ.

Тэрбээр "Хэрэв та авлига авсан бол улс төрийн хувьд үнэнч бус байна гэсэн үг. Харин улс төрийн хувьд үнэнч хүн авлигад холбогдохгүй" гэж Браун хэлжээ. Тэрбээр ХКН-ын системд авилга нь зөвхөн материаллаг зүйл биш, мөн улс төрийн үнэнч бус байдлыг багтаасан "сүнслэг авилга" гэжээ. Зарим шинжээчид авилгын эсрэг тэмцэл удаан үргэлжилж байгаагийн шалтгаан нь авилга нь 1.4 тэрбум хүнийг захирдаг өргөн хүрээтэй хүнд сурталтай, авторитар, дээрээс доош чиглэсэн улс төрийн системийн алдаа биш харин онцлог шинж чанар гэж үзэж байна. Азийн Нийгэмлэгийн сэтгэлгээний төвийн ахлах судлаач Нил Томас "Шигийн баримталж буй арга барил бол сахилга батыг улам чангатгаж, авлигатай тэмцэх ажлыг засаглалын байнгын хэлбэр болгох явдал юм. Ингэснээр энэ ажил хэзээ бүрэн дуусахыг тодорхойлох боломжгүй болж байна” гэжээ. Удахгүй болох хурал онцгой ач холбогдолтой. Учир нь энэ нь ирэх жил болох ХКН-ын XXI их хурлын өмнөх хамгийн чухал хурал байх төлөвтэй байна.

Тус их хурлаар Төв хорооны шинэ бүрэлдэхүүнийг сонгох бөгөөд Ши Жинпинийг ХКН-ын тэргүүний албан тушаалд дөрөв дэх удаагаа томилох (батламжлах) хүлээлттэй байна. Өөрийн эрх мэдэл эсвэл намын нэр хүндэд эрсдэл учруулж болзошгүй хүмүүсийг зайлуулах нь Шигийн хувьд нэн тэргүүний зорилт юм. Гэтэл ийм аюул занал хаа сайгүй бий. Ши албан тушаалдаа очоод 15 орчим жил өнгөрсөн ч ХКН-ын мэдэгдэл болон сүүлийн үеийн олон тооны мөрдөн шалгах ажиллагааны дүнгээс харахад энэ асуудал бүрэн арилаагүй хэвээр байна. Намын засаглалыг ийнхүү онцгойлон анхаарч байгаа нь нам болон цэргийн өндөр албан тушаалтнуудын эсрэг өрнөж буй томоохон хэмжээний мөрдөн шалгах ажиллагаануудтай давхцаж байна. Нэгдүгээр сард Хятадын цэргийн дээд командлалын хоёр дахь хүн, генерал Жан Юушя шалгагдаж эхэлсэн бөгөөд түүнийг өнгөрсөн сард намаас хөөжээ. Тэрбээр үүнээс өмнө цэргийн дээд удирдах байгууллага болох Төв цэргийн зөвлөлөөс (ТЦЗ) аль хэдийн хасагдсан байв. Цэвэрлэгээний улмаас ердийн үед долоон гишүүнтэй байдаг Төв цэргийн зөвлөлд одоо ердөө хоёрхон хүн буюу Ши Жиньпин, тус зөвлөлийн сахилга хариуцлагын асуудал хариуцсан Жан Шэнмин нар л үлдээд байна.

Мөн саяхан албан тушаалаасаа зайлуулагдсан хүмүүсийн дунд Шинжаан дахь намын хорооны дарга асан Ма Шинруй, Чүнчин хотын дарга асан Хуан Чифан нар багтаж байна. Хуан Чифан нь Хятадын улс төрд "хамгийн тэсвэртэй тоглогч" гэгддэг байв. Учир нь,  тэрбээр 2010-аад оны эхээр гарсан, Ши Жиньпиний улс төрийн өрсөлдөгч, Чүнчин хотын намын дарга асан Бо Шилай холбогдсон дуулиант хэргүүдийн үед ч албан тушаалаа хадгалж үлдэж чадсан юм. Тухайн үед Бо Шилай Британийн бизнесмэн Нил Хэйвудын үхэлтэй холбоотой хэрэгт нэр холбогдож, улмаар авлига, хөрөнгө завшсан хэргээр бүх насаараа хоригдох ял сонссон ч Хуан Чифан албан тушаалдаа үлдсэн байлаа.

Гэвч одоо түүний хувьд ч энэ бүхэн төгсгөл болжээ. Хятад улсын асуудал хариуцсан зарим шинжээчид нам болон цэргийн дээд шатны албан тушаалтнуудыг хамарсан энэхүү цэвэрлэгээ нь дэглэмийн тогтворгүй байдлыг илтгэж байна уу гэж асууж байна. Гэвч Ши Жиньпин үүнийг өөрөөр харж байгаа бололтой. Авлигын эсрэг мөрдөн шалгах ажиллагаа нь хэн эрх мэдлийг гартаа барьж байгааг харуулдаг.