“Эрдэнэт үйлдвэр” ТӨҮГ-аас 2025.10.21-нд  350 вагоныг 6 тэрбум төгрөгөөр хоёр сарын хугацаанд түрээслэх тендер зарласан байдаг. Аудитын дүгнэлтээр уг тендерийг илтэд хууль зөрчсөн гэдгийг тогтоосон байна. Уг дүгнэлтэд ОХУ-ын 12-132 загварын хагас вагон эсвэл түүнтэй дүйцэхүйц гэсэн төрлөөр 350 вагоныг тендер зарлалгүй, үндэслэлгүйгээр тендерээ 19-50 ширхгээр хуваан 10 багцалсан. Ингэхдээ тендер шалгаруулалтын баримт бичигт ижил төстэй ажил гүйцэтгэсэн байх шаардлагыг огт оруулалгүй хасаж, нийт хоёр сарын хугацаанд ажиллуулахаар төлөвлөсөн гэдгийг дүгнэн бичжээ.  

Н.Энхбаясгалан нь “Эрдэнэт үйлдвэр”-ийн Хангамжийн хэлтсийн даргаар ажиллаж байгаад 2019 онд 49 хувийн хувьчлалтай холбоотойгоор ажлаа халагдсан найман албан тушаалтны нэг. Түүний  удирддаг “Төмөр замын зураг, төслийн институт” ХХК Эрдэнэт үйлдвэр, Дарханы төмөрлөгийн үйлдвэрийн хувьчлал, Хандгайтын төмөр зам бүтээн байгуулалттай холбоотой дуулианд оролцогч компаниар нэрлэгдэж байсан гэдгээрээ алдартай. Дээрх дуулиант хэргүүдтэй холбогдуулан шүүх дээр хүртэл гэм буруутнаар дуудагдаж байсан хуулийн этгээд юм.


Тухайлбал, нэр бүхий этгээдүүд Дарханы төмөрлөгийн үйлдвэрийн 55 тэрбум төгрөгөөр 300 вагон худалдан авч, “Төмөр замын зураг, төслийн институт” ХХК-ийн нэр дээр оруулж ирсэн. Тэдгээр вагоныг Дарханы төмөрлөгийн үйлдвэрт түрээслэн, 55 тэрбум төгрөг олсон гэдэг баримт өнөөдөр ч хуучраагүй байна. “Төмөр замын зураг, төслийн институт” ХХК-тай холбоотой эдгээр зөрчлийг Засгийн газрын Ажлын хэсэг 2022 онд тогтоогоод, хууль хяналтын байгууллагад хүлээлгэн өгсөн байдаг. Тэр хэрэг одоог хүртэл хууль хяналтын байгууллагад боогдсон хэвээр байгаа.
Тэгвэл Г.Ёндон тэргүүтэй “Эрдэнэт үйлдвэр”-ийн удирдлагууд тендерийн шаардлагаа өөрчилж,  тус компаниас 300 вагон түрээслэхээр болсон нь аудитын шалгалтаар ийнхүү дахин илрэв. Илрэхдээ “Дарханы төмөрлөгийн үйлдвэр” биш “Эрдэнэт үйлдвэр” болж байршлаа өөрчилжээ.

Үндэсний аудитын газраас энэ асуудалтай холбогдуулан “Эрдэнэт үйлдвэр” ТӨҮГ-ын гүйцэтгэх захирал Г.Ёндонд “Худалдан авалтын эрсдэлийг удирдах, ерөнхий нөхцөл магадлахаас зайлсхийж, тендерийн шаардлагыг бууруулсан, тендерт өрсөлдөж байгаа аж ахуйн нэгжийн эцсийн өмчлөгч, хамаарал бүхий этгээдийг тогтоож, ашиг сонирхлын мэдүүлгийг үнэн зөвөөр мэдүүлээгүй зөрчлийг арилгаж, давтан гаргахгүй байх” албан шаардлага хүргүүлээд байгаа юм.

Тендерийг Засгийн газрын тогтоол,  үйлдвэрийн худалдан авах ажиллагааны төлөвлөгөө,  Улаанбаатар төмөр зам ХНН-ийн тоот албан бичигт үндэслэн зарлаж, вагон түрээслэгчийг сонгон шалгаруулалт явуулсан гэдэг тайлбар зүүсэн байна.