Уул уурхайн портал Mining.com цахим хуудас Хятадын зэс үйлдвэрлэгчид ойрын хугацаанд 100 мянган зэс экспортлохоор зэхэж байгаа тухай мэдээллээ. Хятадын талаас ойрын хэдэн долоо хоногт экспортлох 100 мянган тонн зэсийн дийлэнхийг Шанхай дахь баталгаад агуулахаар дамжих магадлалтайг ойрын эх сурвалжууд хэлж байна. Тус агуулахад одоогийн байдлаар 77.8 мянган тонн зэс нөөцөлсөн байна. Энэ оны эхэнд 6.6 мянган тонн байсантай харьцуулахад харьцангуй өндөр тоо юм. Ингэж ихээр өсөх болсон шалтгаан нь эрэлт буурсантай холбоотой гэж шинжээчид таамаглаж байна.

Хэрэв Хятад үнэхээр ойрын хугацаанд 100 мянган тонн зэс экспортолсон тохиолдолд хоёр жилийн дээд түвшинд хүрч өсөөд байгаа зэсийн ханшийг улам өсгөх нөлөөтэй юм байна. Энэ долоо хоногт Лондонгийн металын бирж дээр зэсийн ханш хоёр жилийн дээд түвшинд хүрч тонн тутамдаа 10.2 мянган ам.доллар болсон юм. Хамгийн сүүлд 2022 оны гуравдугаар сард 10.84 мянган ам.долларт хүрээд байжээ.

Олон улсын зэсийн судалгааны групп энэ долоо хоногийн эхэнд нийтэлсэн тайландаа зэсийн илүүдэл энэ онд 162 мянган тонн байх бол, 2025 онд 94 мянган тоннд хүрнэ гэж мэдэгджээ.