Рио Тинто компанийн Зэсийн группийн захирал Б.Болд Дэлхийн зэсийн зөвлөгөөнд оролцох үеэрээ “Аливаа хөрөнгө худалдаж авахаас илүүтэй уурхай барих нь үнэ цэнтэй” гэж мэдэгдлээ. Уул уурхайн портал Mining.com үүнийг уул уурхайн томоохон хэлцлүүд хүлээгдэж буй энэ цаг үед ажиглагчдын урмыг хугалсан тайлбар гэж дүгнэжээ.

Уул уурхайн салбарт дэлхийд хоёрт орох Рио Тинто компани таван жилийн дотор зэсийн олборлолтоо нэг сая тоннд хүргэх зорилт тавиад байна. Одоогоор тус компани жилдээ 700 мянган тонн зэс олборлодог юм. Зэсийн олборлолтоо өсгөх зорилтыг хэрэгжүүлэхэд манай улсад хэрэгжүүлж буй “Оюу Толгой” болон Юта мужид хэрэгжүүлж буй төсөл, түүнчлэн Коделкотой хамтран хэрэгжүүлж буй Чилийн төсөл нөлөөлнө гэж үзэж байна.

Рио Тинто компанийн Зэсийн группийн захирал Б.Бол хэлэхдээ “Бид хаана ямар төсөлд хамтран ажиллах вэ гэдэг дээр гол анхаарлаа хандуулдаг” гэсэн байна. Цаашид эрэлтийн өсөлтийг хэвээр хадгалахад эрчим хүчний шилжилт болон аж үйлдвэрийн салбарын тогтвортой өсөлт голлох нөлөө үзүүлнэ гэж шинжээчид дүгнэжээ.

Эх сурвалж: Mining.com