Манай улсын голлох хөрөнгө оруулагчийн нэг “Рио Тинто” компани Төлөөлөн удирдах зөвлөлдөө өөрчлөлт оруулж, гурван захирлаа огцруулахаар төлөвлөж буйгаа зарлалаа. Ингэснээр Сем Лэйдлоу, Кайса Хиетала, Саймон Хенри нарыг 2025 оны тавдугаар сард ТУЗ-өөс чөлөөлөхөөр болж байна. Ирэх тавдугаар сард “Рио Тинто” компанийн их хурлын дараа дээрх гурван хүнийг үүрэгт ажлаас нь албан ёсоор чөлөөлөх аж.

Сем Лэйдлоу нь 2017 оны хоёрдугаар сард ТУЗ-ийн гишүүнээр томилогдсон хүний нөөц, цалин хөлсний хороон даргаар ажиллаж байсан юм. Харин Кайса Хиетала нь 2023 оны гуравдугаар сард ТУЗ-ийн гишүүн болж эрчим хүчний шилжилт, бизнесийн загварын өөрчлөлт зэрэг хэд, хэдэн чухал шийдвэр гаргасан гэдгээр үнэлэгдэж байсан нэгэн юм. Хамгийн сүүлийн хүн болох Саймон Хенри нь 2017 оны дөрөвдүгээр сард ТУЗ-ийн гишүүн болж 2019 оны тавдугаар сараас хойш Аудит, эрсдэлийн хороон даргаар ажиллаж байгаа нэгэн юм.

"Рио Тинто" компанийн ТУЗ-ийн дарга Доминик Бартон хэвлэлийн мэдээнд дурдахдаа “Компанийн шилжилтийн үе үндсэндээ шувтарч байгаа тул ТУЗ-д өөрчлөлт оруулахаар шийдвэрлэсэн” гэжээ.

Эх сурвалж: Mining