АНУ-ын Ерөнхийлөгч Дональд Трамп ОХУ-ын Ерөнхийлөгч Владимир Путинтай өнгөрөгч лхагва гарагийн өглөө утсаар холбогдсон байна. Энэ удаагийн яриа утасны цаанаас ч гэлээ нэлээд удаан үргэлжилсний хүчинд тун үр бүтээлтэй боллоо. Нэгэнт ярилцсан учраас Украинийн дайныг дуусгах ажилдаа шууд орно гэж Д.Трамп онцолжээ. Ийнхүү дэлхийн хоёр хүчирхэг гүрний Төрийн тэргүүн утсаар ярьсан нь олонд мэдэгдэж буй анхны тохиолдол боллоо гэж олон улсын хэвлэлүүд мэдээлж байна. Учир нь, Д.Трамп өнгөрсөн сарын дундуур Ерөнхийлөгчийн албан үүргээ хүлээн авснаас хойш нэлээд хэдэн улсын тэргүүнтэй утсаар холбогдсон бөгөөд тэдний нэг нь В.Путин байсан гэх мэдээлэл цацагдсан ч албаны эх сурвалжууд албан ёсоор баталгаажуулаагүй билээ.

Зарим эх сурвалжийн дамжуулж буйгаар дайныг дуусгахын тулд сөргөлдөгч талуудыг нэн тэргүүнд хоригдол солилцоо хийх нь зөв бөгөөд дайнд цэг тавихад дөхөм үзүүлэх томоохон алхам гэдгийг албаныхан онцолж байсан.

Д.Трамп Truth Social-д бичихдээ: “Бид Украин, Ойрх Дорнод, эрчим хүч, хиймэл оюун, долларын хүч зэрэг олон сэдвээр удаан ярилцсан. Мөн хоёр орны тэргүүн харилцан айлчлал хийх тал дээр санал нийлж, илүү ойртон хамтран ажиллахаар тохиролцсон. Манай хоёр талаас хэлэлцээрийн баг гарган ажиллаж, Украинийн Ерөнхийлөгч Зеленскийг дайныг дуусгахад өөрийн биеэр хүчин чармайлт гаргахыг шаардана” гэсэн байна.

Тэдний утасны яриа 90 минутийн турш санал нийлсэн, маш тайван өнгө аястай өрнөсөн гэж Кремлиэс мэдээлжээ.