Израилийн Ерөнхий сайд Беньяамин Нетаняаху АНУ-ын Ерөнхийлөгч Дональд Трампын Газын зурвасыг тус улсын мэдэлд шилжүүлэх саналыг дэмжиж, дараа, дараагийн арга хэмжээг хэрэгжүүлэхэд хамтран ажиллахаа илэрхийлжээ. Цагаан ордонд өчигдөр болсон хоёр талын төрийн тэргүүний ээлжит уулзалтын үеэр Д.Трампын дээрх саналын талаар ярилцаж, санаа бодлоо солилцсоны үндсэнд Б.Нетаняаху Газын зурвас дахь палестин иргэдийг тус бүс нутгаас гаргах ажлын бэлтгэл хангахыг зэвсэгт хүчиндээ тушаалаа. Үүний дараа Израилийн Батлан хамгаалахын сайд Исраэль Катц Газын зурвасыг сайн дураар орхин гарах палестинчуудад дэмжлэг үзүүлэх, энэхүү ажиллагааны аюулгүй байдал, дэд бүтцийн асуудлыг шийдвэрлэх бэлтгэл ажилдаа шууд орохыг Өөрийгөө хамгаалах хүчний удирдлагуудад даалгавар болгосон байна.