Сүүлийн хоёр ч арилжаагаар дээд амжилт тогтоогоод байсан алтны ханш өчигдрийн арилжаагаар 2848.27 ам.долларт хүрч, түүхэн дээд амжилт тогтоолоо. Ханш өсөх хамгийн гол шалтгаан нь АНУ-Хятадын худалдааны нэн шинэ дайн болоод байна.

АНУ-ын Ерөнхийлөгч Доналд Трампын засаг захиргаа Хятадын импортын бараанд 10% татвар ногдуулсны дараа БНХАУ-ын Сангийн яамнаас АНУ-аас орж ирж буй шингэрүүлсэн байгалийн хий, нүүрсэнд 15%, түүхий газрын тос, хөдөө аж ахуйн техник, том оврын ачааны машин, дунд оврын ачааны машиндл 10% татвар онооно гэдгээ зарласан юм. Трампын засаг захиргаа ойрын хугацаанд БНХАУ-ын удирдагчтай ярилцахаар болсон ч чухам хэзээ гэдэг нь тодорхойгүй байна.

АНУ-Хятадын худалдааны дайн цаашид хэрхэн үргэлжлэхээс алт болон бусад түүхий эд, үнэт металын ханш хэлбэлзэх хандлагатай байгаа юм. Ойрын хугацаанд талууд тохиролцох хүртэл алтны ханш өссөр байхыг шинжээчид анхаарууллаа.