Туркийн Болу мужид үйл ажиллагаа явуулдаг Карталкаяа амралтын газрын зочид буудалд гал гарсан талаар орон нутгийн хэвлэлүүд өчигдөр мэдээлсэн. Гэтэл өнөөдрийн байдлаар 76 хүн амиа алдаж, 51 хүн гэмтэж бэртсэн гэх харамсалтай мэдээг тус улсын Дотоод хэргийн сайд Али Ерликаяа өгчээ. Хохирогчдын ихэнх нь хүүхэд бөгөөд нийт амиа алдсан хүний 52-ынх нь хэн болохыг олж тогтоож, ар гэрийнхэнтэй нь холбогдсон гэж А.Ерликаяа мэдээлэв.

Галын улмаас үүдсэн эмгэнэлт явдалтай холбогдуулан Туркийн Ерөнхийлөгч Режип Таип Эрдоган лхагва гарагийн гашуудлын өдөр болгон зарлажээ. Тэрбээр Х платформ дахь хаяг дээрээ “Өнөөдөр бол улстөржих бус эвлэн нэгдэх, нэгнээ түшиж өнгөрөөх чухал өдөр юм. Хэргийн эзнийг заавал олж, хариуцлага тооцно” хэмээн бичжээ.

Хавцлын ирмэг дээр барьсан 12 давхар зочид буудлын дулаалгын материал шатамхай чанартай тул гал унтраахад нэлээд хүндрэлтэй тулгарсан учир үйлчлүүлэгчдийн амь насыг авран хамгаалахад хугацаа алдсан гэж онцгой байдлынхан тайлбарлажээ. Засгийн газраас тусгай баг гарган галын хэргийг шалгаж, есөн хүнийг сэжигтнээр татан саатуулсан гэж Хууль зүйн яамны сайд Ильмаз Тунц мэдээлэв.