Колумбын Кататумбо мужид бослого үймээний улмаас амиа алдсан хүний тоо 60-д хүрлээ гэж тус улсын хүний эрхийн төлөө газар мэдээллээ. Венесуэльтэй хил залгаа тус бүс нутаг дахь хар тамхины бүлэглэлүүдийн кокеин худалдааны замыг эрхэндээ оруулахын төлөөх тэмцэл сүүлийн үед улам хурцдаж, зэвсэгт үймээн дэгдээж, энгийн иргэд хохирох болоод байгаа юм. Иргэдээс ирсэн гомдол шалгаж, шийдвэрлэх, зуучлах үйл ажиллагаа явуулдаг Омбудсманы газрын мэдээлснээр Үндэсний чөлөөлөх арми буюу Колумбад идэвхтэй үйл ажиллагаа явуулдаг тус улсын хамгийн том зэвсэгт бүлэг болон Колумбын хувьсгальт зэвсэгт хүчин буюу ФАРК-ынхан 2016 онд найрамдлын гэрээ байгуулсан боловч хар тамхинаас олох ашгийн төлөө дахин сөргөлдөх болжээ.

Дээр дурдсан амиа алдсан 60 хүний тэн хагас нь эмэгтэйчүүд байсан бөгөөд тэдний нэг нь орон нутгийн иргэдийг хамгаалах үйл ажиллагаа явуулдаг Асункат буюу Кататумбогийн тариачдын нэгдлийн холбооны тэргүүлэгч Кармело Геррера байсан гэнэ. Сөргөлдөгч зэвсэгт бүлэглэлүүд орон нутгийн иргэд болон тэдний эрх ашгийг хамгаалах байгууллагын удирдлага, ажилчдыг хулгайлах, барьцаалах, амь насанд нь халдах гэмт хэрэг олонтаа үйлддэг. Тухайлбал, өнгөрсөн долоо хоногийн баасан гарагт Асункат байгууллагын захирлуудын зөвлөлийн гишүүн Рофер Кинтеро, Фрайман Веласкез нар ор сураггүй алга болсон нь хар тамхи наймаалагч бүлэглэлүүдийн гарт орж, амиа алдсан байж магадгүй байна.

Ямартай ч, эхэнд дурдсан харамсалтай мэдээлэл гарсны дараа Колумбын Засгийн газар бүс нутгийн амар тайван байдлыг сэргээх зорилгоор нэмэлт цэргийн хүч илгээх шийдвэр гаргаснаа өчигдөр мэдэгджээ.