Монгол Улсын Засгийн газар, Бүгд Найрамдах Франц улсын “Орано Майнинг” өнөөдөр Улаанбаатар хотод “Хөрөнгө оруулалтын гэрээ” байгуулж, гарын үсэг зурлаа. Гэрээнд гарын үсэг зурах ёслолд МУ-ын Ерөнхий сайд Л.Оюун-Эрдэнэ, Шадар сайд Т.Доржханд, Шадар сайд С.Амарсайхан нарын УИХ болон Засгийн газарын гишүүд оролцсон байна.

Монгол Улсын Засгийн газрыг төлөөлж, гэрээнд Засгийн газрын хэрэг эрхлэх газрын дарга Н.Учрал, Сангийн сайд Б.Жавхлан, Аж үйлдвэр эрдэс баялгийн сайд Ц.Туваан, ажлын хэсгийн гишүүн “Эрдэнэс Монгол” компанийн гүйцэтгэх захирал Н.Наранцогт нар гарын үсэг зурав.

Уран холборлохтой холбоотой хөрөнгө оруулалтын гэрээ нь манай улс гуравдагч хөрштэй байгуулсан хоёр дахь гэрээ гэдгээрээ түүхэн ач холбогдолтой юм. Өнөөдрөөс хөдөлж эхэлж буй энэ гэрээ нь Хамтарсан Засгийн газрын төлөвлөсөн мега төслүүдийн нэг гэдэг утгаараа ч онцлогтой.

Энэхүү гэрээг байгуулснаар Монголын ард түмэнд шууд тусах эдийн засгийн ашиг тус нь таван тэрбум ам.доллараар яригдаж буй бөгөөд Баялгийн сангаар дамжуулан орон нутгийн хөгжлийн санд шууд шилжүүлж, нутгийн иргэдийн боловсрол, эрүүл мэнд, нийгмийн хөгжилд дэмжлэг үзүүлнэ. Гэрээ хэрэгжих явцад гарах бас нэгэн давуу тал бол Монгол Улсын цахилгаан, эрчим хүчний салбарт дэвшил гарч энэ салбарын хангамж баталгаажих юм.

Хөрөнгө оруулалтын гэрээний хүрээнд хэрэгжих Зөөвч-Овоо төсөл нь уранийн нийлүүлэлтээрээ дэлхийн нийт нийлүүлэлтийн дөрвөн хувийг эзлэнэ гэсэн тооцоо гарчээ. Сүүлийн жилүүдэд уранийн үнэ 233 хувиар өссөн нь ашигт малтмалын салбар хамгийн дээд үнийг тогтоосон байна.
Уранийн нөөцөөрөө дэлхийд хоёрдугаарт ордог Монгол Улсын нутагт орших Зөөвч-Овоо нь нөөцөөрөө сүүлийн 20 жилд илрүүлсэн уранийн хамгийн том 10 ордын нэгд зүй ёсоор ордог бөгөөд ирэх 30 жилд 2750 тонн уран үйлдвэрлэх төлөвлөгөөг АНУ-ын “Time” Сэтгүүлд онцолсон удаатай.