Энэтхэг улс гоеологи, судалгааны салбарт Монгол Улстай хамтрах эхний ээлжийн тохиролцоогоо эцэслэн шийдэх гэж байна.

Энэхүү уурхайн гэрээ нь хэрэгцээ нь улам өсөн нэмэгдэж буй Энэтхэгийн эрчим хүч, барилга, ган хайлуулах үйлдвэрийн салбарт нэн шаардлагатай зэс, коксжих нүүрсний нөөцийг тогтвортой барих зорилготой юм гэж Ройтерс агентлаг онцолжээ.

Далайд гарцгүй Монгол Улс нь зэс, коксжих нүүрсний баялаг нөөцтэй бол Энэтхэг улс нь эдгээр ашигт малтмалын импортоос шууд хамааралтай оршдог.

Албаны хүмүүсийн мэдээлснээр Энэтхэгийн Засгийн газар ойлголцлын санамж бичгийг баталсан бөгөөд хоёр тал удахгүй гарын үсэг зурахаар ярилцаж байгаа юм байна.

Гэхдээ одоогоор Энэтхэгийн Холбооны уул уурхайн яамнаас энэ талаар тодорхой тайлбар өгөөгүй бол Монгол Улсын Уул уурхай, хүнд үйлдвэрийн яамнаас удахгүй мэдээлэл өгнө гэлээ.

Тухайн салбарын албаныхны өгсөн мэдээллээр Монгол Улсын талаас дээд зэргийн коксжих нүүрс нийлүүлэх санал тавьснаар Энэтхэгийн компаниудын сонирхлыг ихээр татаад байгаа аж.

Өнгөрсөн оны арваннэгдүгээр сард Энэтхэгийн JSW Steel, Steel Authority of India компанийн төлөөллүүд Монгол Улсаас коксжих нүүрс импортлох хэлэлцээр хийсэн.

Адани, Хиндалко, Веданта зэрэг компани Монгол Улсаас зэс импортлоход ихэд сонирхож байгаа бөгөөд талууд тээврийн асуудлаар зөвлөлдөж, Энэтхэгийн талаас ОХУ-ын Владивостокоор дамжуулан тээвэрлэх санал гаргаад байгаа гэж эх сурвалж дамжууллаа.

БНХАУ-гаар дамжуулах нь илүү дөт бөгөөд тохиромжтой зам боловч ОХУ-ын газар нутгаар дамжуулан тээвэрлэхийг бид илүүд үзэж байна гэж Энэтхэгийн талын эх сурвалж тэмдэглэжээ.

Хэдийгээр талууд зөвшилцөлд хүрсэн гэж байгаа ч 2020 оны хилийн мөргөлдөөнөөс хойш Энэтхэг, Хятадын харилцаа хүйтэрсэн нь дээрх шийдвэр гаргахад голлон нөлөөлсөн болов уу гэж ажиглагчид таамаглаж байна.

Иймд хэзээнээс ойр харилцаатай явж ирсэн ОХУ-ын нутгаар дамжуулахыг илүүд үзсэн байж болох юм.

Хөгжлийн явцыг тус, тусад нь түргэсгэх үүднээс Энэтхэгийн Нүүрсний яамнаас 11 дэх удаагийн арилжааны нүүрсний уурхайн дуудлага худалдаа зохион байгуулж, нүүрсний 27 блокыг үнэ хаялцуулахаар санал болгож буй.

Эдгээр блокын аравыг нь бүрэн судалсан бол арвыг нь хэсэгчлэн судалжээ.

Энэ санаачилга нь бүс нутгийн эдийн засгийн өсөлтийг хангах, ажилгүйдэл бууруулах, Энэтхэгийн нүүрсний нөөцийг нээж, эрчим хүчний аюулгүй байдлыг бэхжүүлэх зорилготой.

Үүнээс гадна, өнгөрсөн оны аравдугаар сард Энэтхэг, АНУ-тай санамж бичиг байгуулж, лити, кобальт зэрэг цахилгаан машин, цэвэр эрчим хүчний технологид ашигладаг бусад чухал ашигт малтмал нийлүүлэх сүлжээ байгуулахаар тохиролцсон юм.