Монгол Улсын Ерөнхийлөгч У.Хүрэлсүх бүрэн эрхийнхээ дагуу 2025 оны Төсвийн тухай хууль болон хамт өргөн мэдүүлсэн, холбогдуулан боловсруулан баталсан хууль тогтоомжид бүхэлд нь хориг тавилаа. Энэ тухай Ерөнхийлөгчийн Тамгын газрын дарга Г.Занданшатар мэдээлсэн байна.

Улсын төсвийг үр ашигтай, хэмнэлттэй, алдагдалгүй батлах шаардлагатай, төсөвт тодотгол хийх тухай тогтоол баталсан нь хуулиа дээдлэх үндсэн зарчим зөрчигдөх нөхцөл бүрдүүлсэн гэх үндэслэлээр хориг тавьжээ.

УИХ-аас 2025 оны төсвийн зарлагыг 26.5 их наяд төгрөгт тогтоож, нэгдсэн төсвийн алдагдал 1.9 их наяд төгрөг байхаар тусгасан Төсвийн тухай хуулийг УИХ-ын гишүүдийн олонх нь дэмжсэнээр энэ сарын 8-ны өдөр эцэслэн баталсан билээ.

Ийнхүү Ерөнхийлөгч бүрэн эрхийнхээ хүрээнд ирэх оны төсөвт бүхэлд нь хориг тавьснаар УИХ-ын хувьд ажлын 14 хоногийн дотор хоригийг хэлэлцэх юм. Хэрэв УИХ-ын гишүүдийн гуравны хоёр нь хоригийг хүлээж авах тухай санал өгвөл Төсвийн тухай хуулийг дахин хэлэлцэх билээ.