Азийн хөгжлийн банк Монгол Улсад уур амьсгалын өөрчлөлттэй тэмцэх үйл ажиллагаанд зориулж 100 сая ам.долларын зээл олгохоор шийдвэрлэлээ. Уур амьсгалын хөрөнгө оруулалтыг эрчимжүүлэх дэд хөтөлбөрт багтсан энэхүү зээлээр Монгол Улс дунд болон урт хугацаандаа уур амьсгалын өөрчлөлттэй тэмцэх үйл хэрэгт зарцуулах юм.

НҮБ болон түүний харьяа байгууллагын судалгаагаар Монгол Улс уур амьсгалын өөрчлөлт, дэлхийн дулааралд өртөх өндөр эрсдэлтэй улс орны тоонд багтдаг юм. Ялангуяа уламжлалт нүүдлийн мал аж ахуйд энэ байдал маш сөргөөр нөлөөлж байгаа бөгөөд сүүлийн үед зудаас шалтгаалан малын зүй бус хорогдол ихсэх хандлагатай байна.

Энэхүү зээлээр ногоон тогтвортой бонд гаргах, банкны салбарын ногоон зээлийн багцыг нэмэгдүүлэх ач холбогдолтой юм. Мөн эрчим хүч, хөдөө аж ахуйд анхаарлаа хандуулж, нүүрстөрөгч багатай, уур амьсгалд дасан зохицох технологи нэвтрүүлэх зорилготой гэж АХБ-ны албан мэдэгдэлд дурджээ.