Энэтхэг улс ойрын хугацаанд Монголын коксжих нүүрсийг ОХУ-аар дамжуулан тогтмол худалдаж авах арга замыг судалж байгаа тухай тус улсын Засгийн газрын өндөр албан тушаалтан “Ройтерс” агентлагт мэдээлжээ. Учир нь Энэтхэг улс транзит тээврийн салбарт хятадаас хараат байдлыг багасгахын тулд ийм арга замыг судалж байгаа аж.

Боловсруулаагүй гангийн хоёр дахь том үйлдвэрлэгч Энэтхэгийн үйлдвэрүүд өнгөрсөн жил Австралийн талын нүүрсний тогтворгүй, хэлбэлзэлтэй нийлүүлэлттэй ихээхэн тэмцсэн юм. Австралийн дотоодод байгаль цаг уурын хүчин зүйл болон бусад нөхцөл байдлаас шалтгаалж нийлүүлэлт тасалдаж байсан билээ. Үүнээс шалтгаалан Энэтхэгийн аж үйлдвэрийн салбарын өсөлт саарах, ойлгомжгүй нөхцөл үүссэн тул өөр арга зам хайхаас аргагүй нөхцөл үүссэн юм. Түүнчлэн Энэтхэгийн томоохон үйлдвэрүүд Монголоос коксжих нүүрс тогтмол нийлүүлэх маршрут боловсруулахыг Засгийн газраасаа хүссэн тухай “Ройтерс” агентлаг мэдээлсэн байна.

Үүнтэй холбоотойгоор Монгол Улсад Энэтхэгийн Засгийн газрын төлөөлөгчид айлчлаад буцсан тухай тус улсын хэвлэлүүд мэдээлжээ.