Оросын томоохон хэвлэл мэдээллийн хэрэгслүүдээр Хятадын хэд, хэдэн банк юаниар төлбөр тооцоо хийхийг зогсоосон тухай мэдээлжээ. Учир нь АНУ-аас ОХУ-д тавьсан эдийн засгийн хоригтой холбоотой юм байна. Одоогоор Хятадын Пин Ан, Нинбо, Гуанфа, Куншан, Шенжен, Жешан зэрэг арилжааны банкууд оросоос юанийн гүйлгээ хийхийг зогсоожээ.

Барууны улс орнууд, АНУ-аас ОХУ-д тавих хоригыг улам чангатгасны улмаас өнгөрсөн оны 12-р сараас эхлэн гүйлгээний хүндрэлүүд гарч эхэлсэн юм. Үүнээс үүдэн зарим банк хаалгаа барьж эхэлсэн билээ. Тухайлбал Чоужоу арилжааны банк хоёрдугаар сард Орос, Беларусь дахь үйл ажиллагаагаа зогсоосон бол Хятадын өөр томоохон гурван банк хоригт хамрагдсан байгууллагуудаас юанийн төлбөр авахаа зогсоосон юм. Гэсэн хэдий ч Оросын талын мэдээлж байгаагаар БНХАУ-тай харилцдаг аж ахуйн нэгжүүдийн 80 орчим хувь нь эдийн засгийн хоригт багтаагүй тул хоёр талын худалдаанд тийм ч том асуудал болохгүй гэж мэдээлж байна.