Азийн хөгжлийн банк Монгол Улсын эдийн засгийн өсөлтийн төлөвийг өмнөхөөсөө ахиулж 5.5% болгожээ. Түүнчлэн 2025 онд зургаан хувиар өсөхөөр тооцсон байна. Аж үйлдвэрийн салбар, тэр дундаа уул уурхайн салбар эдийн засгийн өсөлтийн голлох шалтгаан байна гэж тооцжээ. Төсвийн орлого нэмэгдэхэд нүүрсний экспорт өмнөх оныхоос 37.6 хувиар өссөн нөлөөлж, үйлчилгээний салбарын ачаа эргэлтэд ч сайнаар нөлөөлсөн байна.

Зудаас шалтгаалан оны эхний улиралд уналттай байсан хөдөө аж ахуйн салбар эргэн сэргэж, төсвийн зардал нэмэгдсэнээр ирэх онд эдийн засаг идэвхжих төлөвтэй байгааг АХБ онцолсон юм. Түүнчлэн инфляц саарч, төрийн албан хаагчдын цалин нэмэгдэж, зах зээл дээрх эрэлт сэргэснээр эдийн засгийн өсөлтөд эерэгээр нөлөөлсөн байна.

Хэдийгээр АХБ төсөөллөө ахиулсан ч ойрын хугацаанд төсөөллөө эргэн бууруулж болзошгүй. Учир нь БНХАУ руу экспортлох Монголын түүхий эдийн эрэлт буурах, “Оюутолгой” уурхайн олборлолт саарах зэрэг хүчин зүйл сөргөөр нөлөөлөх эрсдэлтэй.